२५ मंसिर,एजेन्सी ।
दक्षिण कोरियामा पानीजहाज कम्पन्नीका लागि कोरियाली भाषा परीक्षामा सहभागी भएका आवेदकमध्ये करिब ४ हजार १ सय जना उत्तीर्ण भएका छन् । वैदेशिक रोजगार विभागको ईपीएस शाखाका अनुसार भाषा परीक्षाका लागि ३५ हजार जनाभन्दा बढीले फारम भरेकामा ३२ हजार जतिले जाँच दिएका थिए ।
त्यो भनेको जाँच दिएकामध्ये करिब १३ प्रतिशत भाषा परीक्षामा उत्तीर्ण भएका हुन् । कोरियाको मानव संशाधन विकास सेवा (एचआरडीएस) ले नै उनीहरूको परीक्षा लिएको हो । ईपीएस शाखाका अनुसार भाषा परीक्षामा उत्तीर्ण भएका आकाङ्क्षीहरूको अब सीप परीक्षण (स्किल टेस्ट) गरिनेछ ।
जाउलाखेलस्थित प्रशासनिक प्रशिक्षण प्रतिष्ठानमा कोरियाकै टोली आएर यही मङ्सिर २४ गतेदेखि २८ गतेसम्म स्किल (दक्षता) एवं कम्पिटेन्सी (क्षमता) टेस्ट लिनेछ । त्यसपछि उत्तीर्ण व्यक्तिहरूको अन्तिम नतिजा सार्वजनिक हुन्छ । अनि उनीहरूको स्वास्थ्य परीक्षण गराएर रोस्टरमा नाम चढाइने छ ।
भाषा परीक्षामा उत्तीर्ण भएका व्यक्तिमध्ये चार हजार जनाको हाराहारीमा सीप परीक्षणमा पास हुने अधिकारीहरूको अनुमान छ । “एकैचोटि ती चार हजार जना कोरिया गइहाल्ने भन्ने हुँदैन । रोस्टरमा चढाएकाहरू क्रमिक रूपमा जाने हुन्। अबको दुई वर्षभित्र तिनीहरू कोरिया गइसक्छन्,” वैदेशिक रोजगार विभागका अधिकारीहरु बताउँछन् ।
अधिकारीहरुका अनुसार सन् २०२४ को फेब्रुअरीदेखि श्रम स्वीकृति जारी हुन थाल्नेछ र त्यसमा अहिले उत्तीर्ण व्यक्तिहरू समेटिनेछन् । नेपालीले कोरियामा न्यूनतम मासिक तलब दुई लाख रुपैयाँ पाउने गरेका छन् । पानीजहाज निर्माण लगायतका काममा ओभर टाइम केही बढी पाइन्छ ।
ओभर टाइममा डेढी र बिदाको दिन दुई गुनासम्म पाइने भएकोले तीन÷चार लाख रुपैयाँसम्म आम्दानी हुन सक्छ । अधिकांश कामदार आय आर्जनकै लागि कोरिया जाने हुँदा १५ देखि २५ प्रतिशत रकम त्यहाँ खर्च गरेर बाँकी बचत गर्न सम्भव भएको अधिकारीहरू बताउँछन् ।
नेपाली कामदारले पानीजहाज निर्माण क्षेत्रमा खासगरी वेल्डिङको काम गर्नेछन् । त्यसबाहेक पेन्टिङ र इन्सुलेसनको काम पनि उनीहरूले गर्न पाउनेछन् । पूर्ण दक्ष कामदार नजाने भएकाले अन्य निर्माणमा सहभागी हुने सम्भावना चाहिँ न्यून हुन्छ ।
पानीजहाजका लागि विभिन्न निर्माण कम्पनीले सानादेखि ठूलाठूला उपकरण एवं सामग्री बनाउनुपर्ने हुन्छ र त्यस्ता कम्पनीमा नेपालीहरू जाने छन् । कोरियाली विदेश मन्त्रालयका अनुसार उक्त देशबाट निर्यात हुने प्रमुख सामानका सूचीमा पानीजहाज पनि पर्छ ।
उक्त मन्त्रालयको वेबसाइटमा उल्लिखित विवरण अनुसार कोरिया विश्वकै धेरै पानीजहाज बनाउनेमध्ये एउटा देश हो । ईपीएस शाखाका अनुसार कोरिया जाने नेपालीको सङ्ख्या बढ्दो क्रममा छ ।
