२३ पुष,एजेन्सी ।
विगत १५ वर्षदेखि बंगलादेशको प्रधानमन्त्री रहेकी शेख हसिना लगातार चौथो पटक प्रधानमन्त्री बन्ने भएकी छन् । आइतबार भएको विवादास्पद चुनावमा विजयी हुँदै उनी लगातार चौंथो कार्यकाल प्रधानमन्त्री बन्न लागेकी हुन् । उनको पार्टी अवामी लिग र साझेदार दलहरूले २९९ संसदीय सिटमध्ये कम्तीमा १५२ सिट जितिसकेका छन् ।
३ सय सिट भए पनि एक जना उम्मेदवारको मृत्यु भएपछि त्यहाँको निर्वाचन स्थगित गरिएको थियो । बंगलादेशको प्रमुख प्रतिपक्षी दल बंगलादेश नेसनलिस्ट पार्टी बीएनपीलगायत केही प्रभावशाली दलले यो चुनाव बहिष्कार गरेका थिए । यस कारण हसिनाको पार्टी र सहयोगी दलका उम्मेदवारहरूले नै बाँकी सिटहरू पनि जित्ने अनुमान गरिएको छ ।
निर्वाचनको नतिजा औपचारिक रूपमा आज बेलुकासम्म घोषणा हुने बताइएको छ । विपक्षीको बहिष्कारकाबीच करिब ४० प्रतिशत मतदान भएको सरकारी तथ्यांकले देखाएका छन् । यो तथ्यांकमा बढाइचढाइ गरिएको विपक्षीहरूको भनाइ छ । आइतबार मतदानपछि हसिनाले आफूले देशमा प्रजातन्त्र कायम होस् भन्ने सुनिश्चित गर्न सक्दो प्रयास गरिरहेको बताएकी थिइन् ।
चुनाव विथोल्न विपक्षीहरूले दुई दिने आमहडताल घोषणा गरेका थिए । सेनाको प्रत्यक्ष उपस्थितीमा कडा सुरक्षाका बीच पनि भएका प्रदर्शन, झडपलगायत हिंसात्मक गतिविधिका कारण केही मानिसको मृत्यु भएको थियो । प्रहरीले विपक्षी दलका हजारौँ कार्यकर्तालाई पक्राउ गरेको प्राप्त समाचारहरूमा जनाइएको छ ।
लामो समयदेखि हसिनाकी मुख्य प्रतिस्पर्धी खालिदा जिया घरमै नजरबन्दमा छिन् । सन् १९९६ मा पहिलो पटक प्रधानमन्त्री बनेकी हसिनाको यो लगातार चौथो जित र समग्रमा पाँचौँ कार्यकाल हो । हसिना नेतृत्वको बंगलादेशको तस्बिर अन्तरविरोधयुक्त देखिन्छ ।
मुस्लिमबहुल बंगलादेश कुनै समय विश्वकै गरिबमध्येमा पथ्र्यो । २००९ यता हसिनाको नेतृत्वमा यो मुलुकले ठूलो आर्थिक सफलता प्राप्त गरेको छ । अहिले बंगलादेश यो क्षेत्रकै सबैभन्दा तीव्र गतिमा आर्थिक वृद्धि गरिरहेको मुलुक हो । यो मुलुकको प्रतिव्यक्ति आय गएको एक दशकमा तेब्बर भएको छ । र, विश्व बैंकको आंकलनमा अढाई करोडभन्दा ज्यादा मानिस गएको २० वर्षमा गरिबीबाट मुक्त भएका छन् ।
