२७ पुष,काठमाण्डौं ।
नेपालको एकीकरणका सूत्रधार राष्ट्र निर्माता पृथ्वीनारायण शाहको ३०२ औं जन्मजयन्तीको अवसरमा देशव्यापी विभिन्न कार्यक्रम गरिएको छ। सरकारले आज उनको जन्मजयन्तीको अवसरमा सार्वजनिक बिदा त दिएको छ तर सरकारीस्तरबाट कुनै कार्यक्रम आयोजना गरिएको छैन।
राष्ट्रनिर्माताका रुपमा राजनीतिक दल र संघसंस्थाहरुले जन्मजयन्तीको अवसरमा सम्झनास्वरुप विभिन्न कार्यक्रम गरेर मनाइरहेका छन्। राप्रपा नेपाल र राप्रपाले पृथ्बीजयन्तीको अवसरमा चियापान कार्यक्रमको आयोजना गरेका छन्। उनीहरुले हरेक वर्ष पृथ्बीजयन्तीको अवसरमा औपचारिक कार्यक्रम गरि मनाउँदै आएका छन् ।
सरकारले पृथ्बी जयन्तीको अवसरमा सार्वजनिक बिदा दिएपनि औपचारिक कार्यक्रम र प्रधानमन्त्रीबाट घोषित रुपमा शुभकामना समेत व्यक्त गरिएको छैन। नेपाल एकीकरणका प्रणेता रहेका शाहलाई सबैले सम्झिएपनि कतिपयले उनको आलोचना पनि गर्ने गर्दछन्। उनले राज्य एकीकरण आफ्नो शासकीय महत्वकांक्षाले एकल बर्चस्व कायम गर्न राज्यविस्तार गरेको आरोप लगाउँदै आएका छन्।
सरकारको नेतृत्व गरेको माओवादी केन्द्रले उनको जन्मजयन्तीको अवसरमा कुनै सार्वजनिक टिप्पणी गरेको छैन। संस्थागत रुपमा औपचारिक धारणा सार्वजनिक नगरेपनि कतिपयले अनौपचारिक रुपमा शुमकामना व्यक्त गर्दै स्मरण गरेका छन्।
सरकारले सार्वजनिक विदा दिएर पृथ्वीनारायण शाहलाई नसम्झिएपनि राष्ट्रपति रामचन्द्र पौडेलले भने पृथ्बीजयन्तीको अवसरमा सिंहदरबार अगाडिको सालिकमा पुगेर माल्र्यापण गरेका छन् । उनले आज बिहान पृथ्बीनाराण शाहको सालिकमा पुष्पहार अर्पण गरेका हुन्।
यस्तै नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले पनि पृथ्वी जयन्तीको सबैमा शुभकामना ब्यक्त गेका छन् । उनले नेपालको भौगोलिक एकीकरणको नेतृत्वकर्ता पृथ्वीनारायण शाहको ३०२ औं जन्मजयन्तीका अवसरमा उहाँप्रति उच्च सम्मान र श्रद्धा व्यक्त गरेका छन् ।
एमाले महासचिव शंकर पोखरेलले पनि राष्ट्र निर्माता शाहलाई पृथ्बीजयन्तीको अवसरमा स्मरण गरेका छन्। उनले शाहको तस्वीर फेसबुकमा शेयर गर्दै सम्झिएका छन् । उनले लेखेका छन्,‘नेपालको एकीकरणका नायक पृथ्वीनारायण शाहको ३०२ औं जन्मजयन्तीका अवसरमा उहाँप्रतिश्रद्धा सुमन अर्पण गर्दछु।
साथै पृथ्वी जयन्तीको अवसरमा सबैमा हार्दिक शुभकामना!’ यस्तै प्राय सबैजसो राप्रपा नेताहरुले समेत पृथ्वीनारायण शाहको स्मरण गर्दै शुभकामना ब्यक्त गरेका छन् । राप्रपा नेपालका अध्यक्ष कमल थापाले त नेपाल रहेसम्म पृथ्वीनारायण शाह अमर रहने भन्दै उनका बारेमा लामो विश्लेषण गरेका छन् ।
तत्कालीन गोरखाका राजा शाहले राज्य विस्तारको क्रममा बाइसे र चौबिसे राज्यका रुपमा रहेका स–साना राज्यहरुलाई भौगोलिकरुपमा एकीकृत गर्दै आजको विशाल नेपालको आकारमा निर्माण गरेका थिए। उनको योगदानको सम्मानमा सदैब पुस २७ गते जन्मजयन्ती मनाइँदै आइएको छ ।
