१९ माघ, काठमाण्डौ ।
नेपाली राष्ट्रिय महिला फुटबल टोलीकी सर्वाधिक चर्चित फरवार्ड सावित्रा भण्डारी (साम्बा)ले फुटबलको उर्भरभूमि युरोपमा आफ्नो जादु देखाउने भएकी छन् । साम्बाले फ्रान्सको शीर्ष डिभिजन फुटबल खेल्ने भएकी छन् । उनले फ्रान्सको माथिल्लो डिभिजनको क्लब अन आभान्ट ग्वेङगाम्पबाट खेल्ने निश्चित भएको छ ।
सावित्राले बिहीबार क्लबसँग औपचारिक रूपमा अनुबन्ध गरेकी हुन् । साम्बाले क्लबसँग डेढ वर्षको सम्झौता गरेकी छन् । साम्बा २८ नम्बरको जर्सी लगाएर खेलमा सहभागी हुनेछिन् । यसअघि उनले इजरायलको हापोएल रानानाबाट खेलेकी थिइन् । फ्रान्सेली क्लबसँग खेल्ने यसै साताको सुरुमा उनी फ्रान्सतर्फ गएकी थिइन् ।
क्लबले अनुबन्धपछि सावित्राको भिडियो क्लिप पनि सार्वजनिक गरेको छ । युरोपेली महिला फुटबलमा फ्रान्सको लिग माथिल्लो स्तरको मानिन्छ । अहिले ग्वेङगाम्प लिग तालिकाको दशौं स्थानमा छ । क्लबले १२ खेलबाट आठ अंक जोडेको छ । अब शनिबार हुने लिग खेलका लागि उनी छनोट हुने सम्भावना छ ।
अंक तालिकाको तल्लो भागमा रहेको ग्वेंगाम्पले बोर्डोको सामना गर्दैछ । रेलिगेशनबाट टोलीलाई जोगाउनु नै सावित्राको लागि चुनौती हुनेछ । लिगमा अब अन आभान्ट ग्वेङगाम्पले १० खेल खेल्न बाँकी छ । यससंगै सावित्रा युरोपेली क्लब फुटबलको शीर्ष डिभिजनको लिग खेल्ने पहिलो नेपाली खेलाडी बन्न लागेकी हुन् ।
यसअघि उनले इन्डियन्स वुमेन्स लिगमा सनसनी मच्चाएकी थिइन् । उनले २०२२–२३ को सिजनमा चार ह्याट्रिकसहित २९ गोल गरेर इतिहासमेत रचेकी थिइन् । त्यस्तै लिगमा ३ सिजन खेलेकी साम्बाको नाममा सबैभन्दा बढी गोल गर्ने रेकर्डसमेत रहेको छ । उनले इन्डियन वुमेन्स लिगमा ५९ गोल गरेकी छिन् ।
उनीपछि ४ सिजन खेलेकी बाला देवीको नाममा ४८ गोल रहेको छ । सावित्राले अन्तर्राष्ट्रिय फुटबलमा नेपालको लागि सर्वाधिक ४३ गोल गरिसकेकी छिन् । घरेलु लिगमा एपिएफबाट खेल्ने साबित्राले भारतीय महिला लिगमा तेस्रो पटक उपाधि उचालिसकेकी छिन् । भारतीय लिगमा उच्च प्रदर्शनसँगै सावित्रालाई युरोपमा खेल्ने ढोका खुलेको थियो ।
