२८ माघ, काठमाण्डौ ।
बजारमा व्यवसाय विस्तारमा आक्रामक बनेको एनआइसी एसिया बैंक खस्कँदै गएपछि शाखा बन्द गर्ने अवस्थामा पुगेको छ । बैंकको केही शाखा निरन्तर घाटामा गएपछि बन्द गर्न भन्दै नियामक निकाय राष्ट्र बैंकमा निवेदन दिएको छ । बैंकले एकै पटक ५० शाखा तथा एक दर्जन एक्सटेन्सन काउन्टर बन्द गर्न राष्ट्र बैंकलाई निवेदन समेत दिइसकेको छ ।
बैंकले शाखा बन्द गर्न चाहँदैमा तत्काल शाखा बन्द गरिहाल्न भने पाउँदैन । राष्ट्र बैंकले अनुसन्धान गरेर मात्र बन्द गर्ने नगर्ने निर्णय हुने राष्ट्र बैंकले जनाएको छ । बैंकको शाखा खोल्न र बन्द गर्न राष्ट्र बैंकको अनुमति अनिवार्य लिनुपर्ने व्यवस्था छ । राष्ट्र बैंकले अनुमति नदिए शाखा बन्द गर्न सम्बन्धित बैंकले पाउँदैन ।
एनआइसी एसिया बैंकसँग हाल ३६० शाखा, ६४५ एटिएम, ११० वटा विस्तारित काउन्टर र ६१ शाखारहित इकाई छन् । सबैभन्दा बढी शाखा भएको बैंक पनि हो एनिआइसी एसिया । शाखा र कर्मचारी धेरै भएकै कारण बैंकको सञ्चालन खर्च बढी छ । कुनै समय आफूलाई नम्बर वान दाबी गर्ने एनआईसी एशिया बैंकले ऋण उठाउन नसक्दा बैंकको खराब कर्जामा समेत वृद्धि भएको पछिल्लो वित्तीय विवरणले देखाएको छ ।
चालु आर्थिक वर्षको ६ महिनामा बैंकको खराब कर्जाको दर (एनपीएल) ९५ प्रतिशतले बढेको छ । खराब कर्जा बढ्नुले बैंकले गरेको लगानी उच्च जोखिममा रहेको पुष्टि गर्छ । वित्तीय रिपोर्ट अनुसार पुस मसान्तसम्म बैंकले ३ खर्ब ८१ अर्ब निक्षेप संकलन गर्दै २ खर्ब ९३ अर्ब कर्जा प्रवाह गरेको देखिन्छ ।
बैंकको खुद नाफा पनि ४१.८४ प्रतिशतले घटेर १ अर्ब ९० करोड ३८ लाख रुपैयाँमा खुम्चिएको छ । अघिल्लो वर्ष पुस मसान्तमा ३ अर्ब २७ करोड ३३ लाख खुद नाफा आर्जन गरेको थियो । बैंकको प्रतिसेयर आम्दानी ५४.९२ प्रतिशतले घट्न पुगेको छ । यस्तै बैंकले तोकिएको प्राथमिक पुँजी कोष मिलाउन र लाभांश वितरणको कारबाहीबाट बच्न आवासीय लगानीमा अस्वाभाविक कर्जा वृद्धि गरेर रिपोर्ट सार्वजनिक गरेको पाइएको छ।
यही अस्वाभाविक लगानी वृद्धिलाई लिएर राष्ट्र बैंकले बैंकमाथि अनुसन्धान समेत गर्ने भएको छ । मौद्रिक नीतिको व्यवस्था अनुसार हाल आवासीय घर कर्जाको जोखिम भार ६० प्रतिशत मात्र रहेको छ । एनआईसी एसिया बैंकले असारदेखि पुस मसान्तसम्म ६ महिनामा नै आवासीय कर्जामा ७९ अर्ब रूपैयाँले कर्जा वृद्धि भएको देखाएको छ । यता बैंकका डेपुटी सीईओ सुधिर पाण्डेले दिएको राजीनामा सञ्चालक समितिले अस्वीकृत गरेको छ।
पाण्डेले बुधबार सीइओ रोशन न्यौपानेसमक्ष राजीनामा दिएका थिए । शनिबार बसेको सञ्चालक समितिको बैठकमा डेपुटी सीईओ पाण्डेको राजीनामा सीईओ न्यौपानेले सञ्चालक समितिमा पेश गरेका थिए । तर, अहिलेको परिस्थितिमा उच्च व्यवस्थापनको राजीनामाले नकारात्मक सन्देश जाने भन्दै सञ्चालक समितिले पाण्डेको राजीनामा अस्वीकृत गरेको हो । २०७५ मंसिरदेखि पाण्डे डेपुटी सीईओका रुपमा कार्यरत छन् ।
