Nepal Times
Nepal Times
2.35k
Shares

संसदमा प्रश्न उठ्नासाथ राजीनामा दिने मन्त्रीहरु को–को हुन् ?

संसदमा प्रश्न उठ्नासाथ राजीनामा दिने मन्त्रीहरु को–को हुन् ?

६ चैत , काठमाण्डौ ।

नयाँ सरकारमा चौथो ठूलो दल राष्ट्रिय स्वतन्त्र पार्टीको नेतृत्व गर्दै सभापति रवि लामिछाने उपप्रधान तथा गृहमन्त्री बनेसँगै सत्तापक्षबाट प्रतिपक्ष बनेको नेपाली कांग्रेसले लगातार रविको राजीनामा माग गरिरहेको छ। प्रतिपक्षकै माग वमोजिम आज प्रधानमन्त्रीले रविका विषयमा उठेका प्रश्नका बारेमा संसदमा जवाफ दिएका छन् ।

तर प्रतिपक्षले प्रधानमन्त्रीको जवाफ चित्त बुझाएन । रविको लगातार राजीनामा माग गर्दै उनीविरुद्ध छानविन गर्न संसदीय समितिको माग गरेका नेपाली कांग्रेसका प्रमुख सचेतक रमेश लेखकले संसद्मा प्रश्न उठाइएपछि मन्त्रीले राजीनामा दिएका चार उदाहरण प्रस्तुत गरेका छन् । उनले यसअघि प्रश्न उठ्नासाथ विभिन्न समययमा मन्त्रीहरुले राजीनामा दिएको दृश्टान्त दिँदै त्यसै गरी रविले पनि राजीनामा दिनु पर्ने आशय ब्यक्त गरे ।

प्रधानमन्त्रीको जवाफ सुनेपछि लेखकले भने “प्रधानमन्त्रीजीले नेपाली कांग्रेस संसदीय अभ्यासको लामो अनुभव भएको बताउनुभयो । हामीलाई हाम्रो इतिहास स्मरण छ,” मंगलबार प्रतिनिधिसभा बैठकमा लेखकले भने, “यसैगरी मन्त्रीका विषयमा यो सदनमा विगतमा पनि प्रश्न उठेको छ । डा. रामशरण महतको विदेशी बैँकमा खाता छ, राजीनामा दिनुपर्छ भनेर संसद्मा आवाज उठ्यो, उहाँले राजीनामा दिनुभयो । शेरबहादुर तामाङको बोलीका विषयमा प्रश्न उठ्यो, उहाँले राजीनामा दिनुभएको छ । गोकुल बाँस्कोटा यही हुनुहुन्छ, उहाँको विषयमा प्रश्न उठेपछि राजीनामा दिनुभएको छ ।”

प्रश्न उठाइएकै कारण पछिल्लोपटक जनार्दन शर्माले राजीनामा दिएको उनले उल्लेख गरे । विगतमा अरू मन्त्रीका विषयमा पनि प्रश्न उठाइएपछि संसदीय छानबिन समिति गठन गरिएको उनले बताए । अहिले प्रधानमन्त्रीको दाबीका कारण पनि छानबिन समिति आवश्यक भएकामा उनले जोड दिए । “भरतमोहन अधिकारीले बजेट ल्याउँदा कतिपय विषय बाहिरिएको भनेर संसदीय छानबिन समिति बनेको छ ।

विष्णु पौडेलको बजेटको सूचनाका विषयमा पनि प्रश्न उठेपछि संसदीय छानबिन समिति गठन गरिएको छ,” लेखकले भनेका छन् । कांग्रेसले रविमाथिको छानविनका लागि संसदीय समितिको माग पूरा नभए भोलिदेखि संसद नै चल्न नदिने बताइरहदा रविले भने कांग्रेसले लगातार ४ वर्ष संसद अवरुद्ध गरेपनि आफु निरन्तर काम गरिरहने बताएका छन् ।

उनले ठाडो उजुरीका आधारमा राजीनामा नदिने बताएका छन् । यस्तै प्रधानमन्त्री र अर्काे सत्तारुढ दल नेकपा एमालेका अध्यक्ष केपी शर्मा ओलीले पनि रविविरुद्ध सहकारी प्रकरणमा कुनै प्रमाण नभेटिएको भन्दै छानविन र राजीनामा नदिने बताइसकेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.