९ चैत , काठमाण्डौ ।
सुनतस्करी प्रकरणको अनुशन्धानका लागि पक्राय परेका माओवादी उपाध्यक्ष एवम् पूर्वसभामुख कृष्ण बहादुर महरा चार दिनमै हिरासतमुक्त भएका छन्। प्रहरीको केन्द्रीय अनुसन्धान ब्युरो (सीआईबी) ले तेस्रो चरणमा प्रतिवादी बनाउने तयारी गरिरहेका महराविरुद्ध मुद्धा चलाउने गरी केही प्रमाण नभेटिएको भन्दै हाजिरी जमानीमा छाडिएको छ ।
सोमबार कपिलवस्तुबाट पक्राउ गरेर काठमाडौं ल्याइएका महरा शुक्रबार हाजिरी जमानीमा रिहा भएका हुन्। उनलाई खोजेको बखत उपस्थित हुने गरी छोरा निर्मलको जिम्मामा रिहा गरिएको सीआईबीका प्रवक्ता एसपी होबिन्द्र बोगटीले बताएका छन् । महराका अर्का छोरा राहुल भने सुन तस्करीकै प्रकरणमा पुर्पक्षका लागि थुनामा छन् ।
जिल्ला सरकारी वकिल कार्यालयमा कागज गरेर रिहा भएका महरा पुनः अस्पतालमै फर्किएका छन्। महरा हिरासतमुक्त भए पनि अनुसन्धान भने जारी रहने एसपी बोगटीको भनाई छ। महराको स्वास्थ्य समस्या र अनुसन्धानमा प्रमाण लोप हुने सम्भावना पनि नभएकाले रिहा गर्नु परेको सीआईबीको दाबी छ। सीआईबीका अधिकारीका अनुशार उनलाई मुद्दा चलाउन बलियो प्रमाण भेटिएको छैन् ।
महराविरुद्ध अहिलेसम्म टेलिफोन गरेको मात्रै प्रमाण भेटिएको छ । स्वयम महराले समेत तस्करीको आरोप लागेका चिनियाँसँग चिनजान रहेको तर कुनै कारोबार नरहेको बयान दिएका छन् । चार दिन नियन्त्रणमा राख्दा सीआईबीले महरासँग दुई दिन बयान लिएको थियो भने दुई दिन दिनभरी नै अस्पतालमै राखिएको थियो।
अब अनुसन्धान पूरा भएपछि महराविरुद्ध पुरक अभियोग अदालतमा दायर हुनेछ। त्यसपछि उनलाई थुनामा राख्ने कि थुनाबाहिरै राखेर मुद्दाको फैसला गर्ने भन्ने जिल्ला अदालतबाट आदेश हुनेछ। २०७९ पुस १० गते दुवईबाट भेपमा लुकाएर ल्याएको सुन विमानस्थल भन्सारमा रोकिएको थियो। सुन ल्याएर आएका चिनियाँ नागरिक दाहोजिन वाङ यो मुद्दाका मुख्य प्रतिवादी हुन्।
उनले भने सुन पक्राउ परेपछि नेपाल छाडिसकेका छन्। महरा बाबु छोराले भन्सारमा सुन पक्राउ परेपछि दावाजिनकै अनुरोधमा सुन छुटाउन टेलिफोन गरेको आरोप छ। उनीहरुले टेलिफोन गरेको पुष्टि भएको सीआईबीले जनाएको छ। महराले पनि बयानका क्रममा टेलिफोन गरेको स्वीकार गरेका छन्। तर उनले सुन छुटाउन नभई अन्य कामले फोन गरेको दाबी गरेका छन्।
यसअघि सुन तस्करी जाँचबुझ आयोगले महरालाई पनि प्रतिवादी बनाउन निर्देशन दिएपछि सोमबार सीआईबीले कपिलवस्तुबाट पक्राउ गरेर महरालाई काठमाडौं ल्याएको थियो। तर उनी विभिन्न रोगका कारण अस्वस्थ रहेकाले स्वास्थ्य उपचारको व्यवस्था गर्न अदालतले आदेश दिएको थियो। अदालतको आदेशपछि उनलाई पहिलो दिनदेखि नै नर्भिक अस्पतालमा भर्ना गरिएको थियो।
