२० चैत , काठमाण्डौ ।
उपप्रधान एवंं गृहमन्त्री रवि लामिछाने र नेपालका लागि जर्मन राजदूत थोमस प्रिन्जबीच भेटवार्ता भएको छ । मंगलवार गृह मन्त्रालयमा भएको भेटघाटका क्रममा राजदूत प्रिन्जले नेपालको अध्यागमन प्रशासन सुधार गर्नका लागि अत्यावश्यक देखिएको ई–गेट निर्माणमा सहकार्य गर्न खोजिएको जानकारी दिएको गृहमन्त्री लामिछानेको सचिवालयले जनाएको छ ।
गृहमन्त्री लामिछानेले जर्मनी जान इच्छुक नेपाली विद्यार्थीका लागि अध्ययन र काम सँगसँगै गर्न मिल्ने गरी भोकेसनल ट्रेनिङमा पठाउने विषयमा श्रम, शिक्षा र गृह मन्त्रालयबीच समन्वय हुन नसक्दा अध्यागमनबाट फर्कन परेको गुनासो राखेका छन् । गृहमन्त्री लामिछानेले अध्यागमनलाई अत्याधुनिक बनाइ नेपाल भित्रने पर्यटकको आकर्षण र सीमा अपराध न्यूनीकरण गर्नका लागि समेत ई–गेट (सफ्टवयर र हार्डवयर) तर्फ सुधार आवश्यक भएकाले सो सम्बन्धमा अध्ययन र छलफल गरी निष्कर्षमा पुगिने बताएका छन् ।
भोकेसनल ट्रेनिङमा जान इच्छुक विद्यार्थीका लागि आवश्यक समन्वय गरी सहजीकरण गरिने उनले बताएका छन् । राजदूत प्रिन्जले घनिष्ठ सम्बन्ध रहेको देशको नाताले अनन्तकालसम्म साझेदारी, समन्वय र सहकार्य रहने प्रतिबद्धता व्यक्त गरेका छन् । दोस्रो पटक गृहको नेतृत्व सम्हालेपछि लामिछानेले भारत र चीनका राजदूतसँग पनि भेटवार्ता गरिसकेका छन् ।
