विराटनगर,भदौ ३०
विराटनगर हार्डवेयर संघको शनिबार विधिवत् रुपमा उद्घाटन गरिएको छ । विराटनगरको हनुमानदास रोडस्थित संघको कार्यालयमा अध्यक्षद्वारा विधिवत् रुपमा धार्मिक पुजापाठ गरी उद्घाटन गरिएको हो ।
वि.सं २०५४ सालमा विराटनगर हार्डवेयर संघको दर्ता भएपनि निस्कृय रुपमा रहेको र २०७४ फागुन २० मा गठित नयाँ कार्यसमितीले संघलाई सक्रिय बनाउने प्रयास स्वरुप २०७५ बैशाख ६ मा नविकरण गरी कार्यालय स्थापना गरिएको विराटनगर हार्डवेयर संघका अध्यक्ष मुकुन्द दाहालले बताए ।
अब नियम कानुनको परिधीभित्र रहेर हार्डवेयर ब्यबसायी र उपभोक्ताहरुको हकहितको लागि संघले कार्यगर्ने उनले जानकारी दिए । निर्माण सामाग्रीहरुको बारेमा अनुसन्धान गरी नयाँ निर्माण सामाग्रीहरुको उपभोक्ताहरुलाई जानकारी गराउनु आफूहरुको कर्तब्य भएको अध्यक्ष दाहालको भनाई छ । उनले बजारमा भएको मूल्यवृद्धि र गुणस्तरहीन सामाग्रीको विक्री वितरण रोक्न सरकारले अनुगमन टोली बनाई नियन्त्रण गर्नुपर्नेमा पनि जोड दिए ।
विराटनगर हार्डवेयर संघमा विराटनगर महानगरपालिका भित्रका हार्डवेयर ब्यबसायीले सदस्यता लिन सक्नेछन् । संघको हाल ११ जनाको कार्यसमिती रहेको छ । विराटनगरमा अहिले २ सयभन्दा बढी हार्डवेयर ब्यवसायी रहेका छन् । ती मध्ये सय हार्डवेयर ब्यवसायी संघमा आबद्ध रहेका छन् ।
