२० चैत , काठमाण्डौ ।
बालेन नेतृत्वको नवगठित सरकारको यो कदमले पिडित तथा आम सर्वसाधारणमा सरकार भएको सकारात्मक उर्जाको संचार गरेको छ। केही समय अघि उद्धार उडान भएपनि युद्धबाट प्रभावित नेपालीहरुको संख्या बढिरहेको अवस्थामा नेपालीहरुले उडानको माग गरिहेको अवस्थामा बालेन सरकारले उद्धार उडान सुरु गरेको हो ।
खाडी तथा मध्यपूर्वका विभिन्न देशहरूमा रहेका नेपाली नागरिकहरूको उद्धारका लागि सरकारले विशेष उडान सञ्चालन गर्ने निर्णय गरेको छ। परराष्ट्र मन्त्रालयले दिएको जानकारीअनुसार नेपाल एयरलाइन्स मार्फत आजदेखि लगातार तीन दिनसम्म चार वटा विशेष उडान सञ्चालन गरिनेछन्, जसबाट संकटमा परेका तथा स्वदेश फर्कन चाहने नेपालीहरूलाई प्राथमिकताका साथ उद्धार गरिनेछ।
परराष्ट्र मन्त्री शिशिर खनालका अनुशार, पश्चिम एसियामा विद्यमान तनाव तथा सुरक्षा अवस्थाका कारण नियमित उडानहरू २८ फेब्रुअरी २०२६ देखि स्थगित रहँदा उत्पन्न असहज परिस्थितिलाई मध्यनजर गर्दै नेपाली नागरिकहरूको उद्धार तथा आवागमनलाई सहज बनाउने उद्देश्यले आवश्यक हवाई सेवा सञ्चालन गर्ने विषयमा छलफल गरिएको छ।
उक्त छलफलपश्चात नेपाल वायुसेवा निगमले मिति ३ देखि ५ अप्रिल २०२६ सम्म विभिन्न गन्तव्यहरूमा विशेष उडान सञ्चालन गर्ने निर्णय गरेको छ। मन्त्री खनालले उक्त विशेष उडानहरूको व्यवस्थापन तथा सञ्चालनका लागि आवश्यक सहजीकरणमा सहयोग पु¥याउनुहुने नेपाल एयरलाइन्स तथा राष्ट्रिय बीमा कम्पनी लिमिटेड प्रति कृतज्ञता समेत व्यक्त गरेका छन् ।
उनले ०१ अप्रिल २०२६ मा कुवेत एयरवेजको एक उडानमार्फत २९१ जना यात्रु स्वदेश फर्किएको र सोही उडानबाट विभिन्न कारणले निधन भएका नौ (९) जना नेपाली नागरिकहरूको शवसमेत नेपाल ल्याइएको जानकारी दिएका छन् ।
आज साँझ काठमाडौँबाट नेपाल वायु सेवाको जहाज संयुक्त अरब इमिरेट्सको दुबईतर्फ उड्ने तयारी गरिएको छ।
उक्त उडानमार्फत फर्किनका लागि पहिले नै टिकट बुक गरिसकेका नेपाली नागरिकहरूलाई प्राथमिकता दिइने बताइएको छ भने आकस्मिक रूपमा स्वदेश फर्किन चाहनेहरूलाई पनि सम्बन्धित निकाय तथा एजेन्टमार्फत समयमै सम्पर्क गर्न आग्रह गरिएको छ।
दुबईस्थित नेपाली दूतावासले यात्रु व्यवस्थापन, कागजी प्रक्रिया र आवश्यक सहजीकरणका लागि समन्वय गरिरहेको जनाएको छ। उक्त जहाज भोलिपल्ट दुबईबाट काठमाडौँ फर्कने कार्यतालिका तय गरिएको छ। त्यसपछि पर्सि अर्थात् २२ गते काठमाडौँबाट अर्को विशेष उडान साउदी अरेबियाको दमामका लागि प्रस्थान गर्नेछ, जसले सोही दिन नेपाली यात्रुहरू बोकेर काठमाडौँ फर्कने योजना रहेको छ।
यी उडानहरूमा प्राथमिकता बिरामी, समस्यामा परेका, काम गुमाएका तथा तत्काल स्वदेश फर्कनुपर्ने अवस्थामा रहेका नेपालीहरूलाई दिइने तयारी भइरहेको मन्त्रालयले जनाएको छ।मध्यपूर्वका विभिन्न देशहरू—जस्तै यूएई, साउदी अरेबिया, कतार, कुवेत लगायत क्षेत्रमा कति संख्यामा नेपालीहरू स्वदेश फर्कन इच्छुक छन् भन्ने यकिन तथ्यांक संकलन गर्ने काम पनि ती देशमा रहेका नेपाली दूतावासहरूले गरिरहेका छन्।
साथै, आवश्यक परे थप उडान सञ्चालन गर्ने विषयमा समेत सरकार आन्तरिक तयारीमा जुटेको छ।हाल मध्यपूर्व क्षेत्रमा जारी द्वन्द्व तथा असुरक्षाका कारण नियमित अन्तर्राष्ट्रिय उडानहरू प्रभावित भएका छन्। उडान अवरुद्ध हुँदा धेरै नेपाली कामदार तथा अन्य नागरिकहरू अलपत्र परेका छन् र सुरक्षित रूपमा स्वदेश फर्कन नपाएको गुनासो गर्दै आएका छन्।
यही अवस्थालाई मध्यनजर गर्दै सरकारले तत्काल राहतस्वरूप विशेष उडानको व्यवस्था गरेको हो। सरकारले सम्बन्धित देशका नेपाली दूतावासहरूलाई आफ्ना नागरिकहरूको विवरण संकलन, आवश्यक परामर्श र सहजीकरणमा सक्रिय हुन निर्देशन दिएको छ।
साथै, स्वदेश फर्कने नागरिकहरूलाई आवश्यक स्वास्थ्य मापदण्ड, यात्रा सम्बन्धी कागजात तथा सुरक्षा प्रक्रियाहरू पूरा गर्न पनि आग्रह गरिएको छ।यस विशेष उद्धार अभियानलाई प्रारम्भिक चरणको रूपमा हेरिएको छ, र आगामी दिनमा परिस्थिति अनुसार थप उडान तथा अन्य विकल्पहरू समेत प्रयोग गरेर विदेशमा रहेका नेपाली नागरिकहरूको सुरक्षित स्वदेश फिर्ती सुनिश्चित गरिने सरकारी स्रोतले जनाएको छ।
