१ वैशाख , एजेन्सी ।
इन्डियन प्रिमियर लिग (आईपीएल) क्रिकेटमा दिल्ली क्यापिटल्सले इन्डियन प्रिमियर लिग (आइपिएल) मा दोस्रो जित निकालेको छ । गएराति लखनउमा भएको खेलमा घरेलु टोली दिल्लीसँग ६ विकेटले पराजित भयो । जेक फ्रेसर म्याकग्रुकले आपिएल २०२४ मा डेब्यू गर्दै अर्धशतक बनाएपछि दिल्ली क्यापिटल्सले शुक्रबार लखनउ सुपर जायन्ट्सलाई ६ विकेटले पराजित गरेको हो ।
१ सय ६८ रनको लक्ष्य पछ्याएको दिल्लीले ११ बल बाँकी छँदा ४ विकेट गुमाएर १ सय ७० रन बनाउँदै खेल जितेको हो। म्याकग्रुकले कप्तान ऋषव पन्तसँग तेस्रो विकेटका लागि ७७ रनको साझेदारी गरेका थिए। अस्ट्रेलियाली म्याकग्रुकले ३५ बलमा ५५ रन जोडे । उनले २ चौका र ५ छक्का प्रहार गरे । ऋषवले पनि ४१ रन बनाएका थिए ।
पहिले ब्याटिङ गर्दै लखनउले ७ विकेटमा बनाएको १ सय ६७ रनलाई उछिन्यो । लखनउका लागि आयुष बदोनीले सर्वाधिक ५५ रन बनाए । दिल्लीका लागि २० रन खर्चेर ३ विकेट लिएका कुलदीप यादव ‘प्लेयर अफ द म्याच’ बने । दिल्ली दोस्रो जितपछि १० टोली सम्मिलित आइपिएल अंक तालिकाको नवौं स्थानमा उक्लेको छ । लखनउ चौथो स्थानमा छ ।
६ खेलमा २ अङ्क मात्रै रहेको आरसीबी पुछारमा छ । ५ खेलमा ८ अङ्क रहेको राजस्थान रोयल्स शीर्ष स्थानमा छ । यसैविच, आईपीएल क्रिकेटमा आज पञ्जाब किङ्स र राजस्थान रोयल्स् खेल्दैछन् । पञ्जाबको घरेलु मैदान मुल्लान्पुरमा यो खेल नेपाली समय अनुसार बेलुका पौने ८ बजे शुरू हुनेछ ।
पाँच खेलमा चार वटा खेल जितेको राजस्थान ८ अङ्कसहित तालिकाको शीर्ष स्थानमा छ । समान खेलमा दुई वटा मात्र जितेको पञ्जाब ४ अङ्कका साथ आठौँ स्थानमा छ । राजस्थान आईपीएल क्रिकेटको पहिलो सिजनको विजेता र सन् २०२२ को उपविजेता टोली हो । पञ्जाब सन् २०१४ को उपविजेता टोली हो ।
