३० असार , काठमाण्डौ।
यो साताको कारोबारको पहिलो दिन आज सेयर बजारले अर्ध सतक पार गरेको छ । सत्ता समिकरणको प्रभाव सेयर बजारमा देखिएको छ । सत्ता परिवर्तन भएसगै अर्थमन्त्रीमा एमालेका उपाध्यक्ष बिष्णु पौडेल आउने चर्चाले बजार बढेको टिप्पणी पनि गरिएको छ । कारोबारको सुरुको केही मिनेटमा नै बढेर २२९० पुगेको बजारमा गिरावट देखिएको थियो ।
तर अन्तिम समयमा बजार ५२.९७ अंकले बढेर परिसूचक २२५७.५९ बिन्दुमा रोकिएको छ । आज सेन्सेटिभ इन्डेक्स र फ्लोट इन्डेक्स पनि दुई प्रतिशतभन्दा धेरैले बढेका छन् । ३०९ कम्पनीको २ करोड २० लाख ४७ हजार ३२७ कम्पनीको ७ अर्ब ६२ करोड ४ लाख ९८ हजार ५२० रुपैयाँको सेयर किनबेच भएको छ ।
कारोबारमा सबै समूहको उपसूचकमा हरियाली छाएको छ । लगानीकर्ताको ध्यान बैंक, जलविद्युत कम्पनीमा बढी परेको छ । जीवन बिमा, उत्पादन तथा प्रशोधन समूहका कम्पनीमा पनि लगानीकर्ताको आकर्षण देखिएको छ । कारोबारमा २०१ कम्पनीको सेयर मूल्य बढेको छ भने ३६ वटाको घटेको छ ।
कारोबारमा रिडी पावर कम्पनी र माण्डू हाईड्रोपावरको सेयर मूल्यमा सकारात्मक सर्किट लागेको छ । हिमाल दोलखा हाइड्रोपावर, अरुण भ्याली हाइड्रोपावर र जानकी फाइनान्सको सेयर मूल्य पनि नौ प्रतिशतभन्दा धेरैले बढ्दा प्राइम डिबेन्चर–२०८४ चार प्रतिशत तथा बलेफी हाइड्रोपावर र एनआइसी एसिया सेलेक्ट फन्ड– ३० तीन प्रतिशतभन्दा धेरैले घटेका छन् । गत वर्ष साउन ७ गते नेप्से २२२७ बिन्दुमा पुगेको थियो ।
