३ साउन , एजेन्सी ।
अमेरिकी राष्ट्रपति जो बाइडेनलाई कोभिड देखिएको छ । सामाजिक सन्जालमा ‘म बिरामी परे’ भनेर लेखेका बाइडेनलाई कोभिड भएको बीबीसीले उल्लेख गरेको छ । राष्ट्रपति पदको दौडबाट पछि हटेर अर्कालाई मौका दिन डेमोक्र्याटिक पार्टीबाटै दबाब बढ्दै गएका बेला बाइडेनलाई कोभिड भएको हो।
अब ८१ वर्षे बाइडेनलाई राष्ट्रपतिको चुनाव नलड्न झन् दबाब बढ्नसक्छ। ह्वाइट हाउसका प्रेस सेक्रेटरी करेन जीन पियरेका अनुसार अमेरिकी राष्ट्रपतिलाई कोरोनाविरुद्ध भ्याक्सिन दिइएको छ। प्रेस सेक्रेटरीका अनुसार बाइडेनलाई यसअघि पनि दुईपटक कोभिड–१९ भएको थियो।
अहिले फेरि कोरोना संक्रमण भएको कुरा बाइडेन आफैँले पनि सामाजिक सञ्जालमार्फत जानकारी दिएका छन्। उनले आफू स्वस्थ हुँदै गएको उल्लेख गर्दै आफ्नो स्वास्थ्यलाभको कामना गर्ने सबैलाई धन्यवाद दिएका छन्। बाइडेन बुधबार लस भेगासमा आफ्ना समर्थकसँग भेटघाट र अन्तरक्रिया गरिरहेका थिए।
पछि उनले चुनावी भाषण रद्द गरे। बाइडेनलाई कोभिड पुष्टि हुनु अगाडि डेमोक्रेटिक पार्टीका नेताहरुले भेट गरेका थिए । अमेरिकी राष्ट्रपति जो बाइडेनलाई उनकै दलकी नेत्री तथा पूर्वसभामुख न्यान्सी पेलोसीले चुनाव जित्न नसक्ने बताएकी छिन्। पेलोसीले बाइडेनलाई चुनावी प्रक्षेपण हरुमा कमजोर देखिएको भन्दै निजी रुपमा यस्तो भनेको सीएनएनले उल्लेख गरेको छ ।गत जुन २७ मा ट्रम्पसग भएको डिबेटमा बाइडेनको कमजोर प्रदर्शन भएको थियो । डिबेटपछि ट्रम्पको लोकप्रियता बढेको पाइएको थियो । डिबेटपछि जो बाइडेनलाई चुनावबाट बाहिरिन न्यू योर्क टाइम्स, डेमोक्रेटिक पार्टीका नेता तथा चन्दादाताले सार्वजनिक तथा निजी दुवै रुपमा बाइडेनलाई र उनको अभियानलाई आग्रह गरेका थिए ।
यसअघि अमेरिकी राष्ट्रपति जो बाइडेनलाई आफ्नो उमेद्वारी फिर्ता लिन अमेरिकी अखबार न्यू योर्क टाइम्सको सम्पादकीयदेखि चुनावी चन्दादाताले आग्रह गरेका थिए । न्यू योर्क टाइम्सले चार वर्षअघिका जस्ता प्रभावशाी बाइडेन अहिले नभएको भन्दै उनलाई उम्मेदवारी फिर्ता लिन आग्रह गरेको छ ।
पत्रिकाले सम्पादकीयमार्फत् बाइडेन यो पटक उम्मेदवार हुने बारेमा बलियो तर्क नभएको जिकिर गरेको हो । डेमोक्रेटिक दलसँग झुकाव राख्ने र डेमोक्रेटिक उम्मेदवारलाई इन्डोर्स गर्दै आएको न्यू योर्क टाइम्सले मात्रै होइन, बाइडेनका चन्दादाताहरूले पनि उनलाई उम्मेदवारी फिर्ता लिन आग्रह गरेका छन् ।
