१३ साउन, एजेन्सी ।
इजरायलको कब्जामा रहेको सिरियाको दक्षिण पश्चिम क्षेत्र गोलान हाइट्समा रकेट आक्रमण भएको छ । जसमा परि १२ बालबालिका र एक किशोरको मृत्यु भएको छ । त्यहाँको एक फुटबल मैदानमा रकेट आक्रमण भएको हो । जसमा १० जनाभन्दा बढी घाइते पनि भएका छन् ।
इजरायली सेनाले रकेट हिजबुल्लाहले प्रहार गरेको आरोप लगाएको छ । तर हिजबुल्लाहले यो दाबी अस्वीकार गरेको छ । यता इजरायलका प्रधानमन्त्री बेन्जामिन नेतान्याहुले भने यस हमलाको निन्दा गर्दै आक्रमणकारीले यसको ठूलो मूल्य चुकाउनु पर्ने चेतावनी दिएका छन् । यो आक्रमणपछि इजरायल र हिजबुल्लाहबीच प्रत्यक्ष युद्ध हुनसक्ने अनुमान गरिएको छ ।
गत वर्ष अक्टोबरमा इजरायल–गाजा युद्ध सुरु भएदेखि इजरायली सेना र हिजबुल्लाहबीच लगातार गोली हानाहान भइरहेको छ । गोलान हाइट्सको घटना अक्टोबर ७ मा इजरायल–गाजा युद्ध शुरु भएपछि इजरायलको उत्तरी सिमानामा सबैभन्दा धेरै ज्यान गएको घटना हो । यसैबीच इजरायलले गाजाको एक विद्यालय नजिक गरेको आक्रमणमा कम्तीमा ३० जनाको मृत्यु भएको छ ।
घटनामा एक सय जना घाइते भएका छन् । यो आक्रमण अमेरिकामा बेन्जामिन नेतन्याहूले गाजामा युद्ध अन्त्य गर्न आफू तयार रहेको भन्ने संदेश दिएपछि भएको हो । इजरायली सेनाले विद्यालयबाट सञ्चालित हमास आतङ्कवादीलाई लक्षित गरी आक्रमण गरेको जनाएको छ । गाजाको नागरिक प्रतिरक्षा निकायले विद्यालयमा शरण लिएका झन्डै चार हजार विस्थापित मानिस बसिरहेको बताएको छ
