२९ साउन, विराटनगर । सुनसरी धरान उपमहानगरपालिकाबाट प्रहरीले एक क्विन्टल गाँजा बरामद गरेको छ ।
धरान-१५ श्यामचोकबाट पानबारीतर्फ जाने सेउती पुलमा गस्तीमा रहेको प्रहरीले मंगलबार दिउँसो भारतीय नम्बर प्लेटको डब्लुबी ७४ एस २५३१ नम्बरको कारमा लोड गरिएको गाँजा नियन्त्रणमा लिएको हो ।
गस्तीमा रहेका प्रहरीलाई छलेर भाग्न खोज्दा प्रहरीले चाइनिज पेस्तोलबाट एक राउन्ड हवाई फायरसमेत गरेको थियो ।
हवाई फायरपछि चालक कारबाट उत्रिएर जंगलतिर भागेको प्रहरीले जनाएको छ । चेकजाँच गर्दा कारमा रहेको प्लास्टिकको पाँचवटा बोरामा एक सय केजी अवैध लागूऔषध गाँजा बरामद गरिएको थियो ।
कार चालक फरार रहेकाले खोजी कार्य भइरहेको र घटनाको थप अनुसन्धान सुरु गरेको भण्डारीले बताए ।
