३ भदौ, विराटनगर ।
स्पेनिस ला लिगामा डिफेन्डिङ च्याम्पियन रियल मड्रिडले खराब सुरुआत गरेको छ । आइतबार राति आफ्नो पहिलो खेल खेलेको रियलले मल्लोर्कासँग १-१ गोलको बराबरी खेल्दै अंक बाँडेको हो ।
मर्लोर्काको मैदानमा भएको खेलमा रियलका लागि रोड्रिगोले सुरआती गोल गरेका थिए । खेलको १३ औं मिनेटमा भिनिसियस जुनियरको पासमा गोल गर्दै रोड्रिगोले पाहुना टोलीलाई पहिलो हाफभरि अग्रता दिलाएका थिए ।
तर, खेलको ५३औं मिनेटमा मल्लोर्काका रोड्रिग्वेजको पासमा वेदान मुरिकीले गोल गरेपछि घरेलु टोलीले एक अंक बटुल्ने मौका पायो ।
खेलको अन्त्यतिर फेर्लान मेन्डीले रातो कार्ड पाएपछि रियल १० खेलाडीमा सीमित बनेको थियो ।
डेब्यु खेलमै गोल गरेका फ्रेन्च स्टार किलियन एम्बाप्पेको ला लिगाको डेब्यु भने राम्रो रहेन । गत बुधबार राति भएको युइएफए सुपर कपको फाइनलमा रियलले अटलान्टालाई २-० गोलले हराउँदा एम्बाप्पेले गोल गरेका थिए ।
मिडविकमा डेब्यु एम्बाप्पेको यो रियलका लागि दोस्रो खेल थियो । तथापि, ला लिगामा भने पहिलो । तर उनी राम्री चल्न सकेनन् ।
