१६ भदौ, विराटनगर ।
इंग्लिस प्रिमियर लिगअन्तर्गत नर्वेका स्टार फुटबलर इयर्लिङ हालान्डले ह्याट्रिक गरेको खेलमा साविक विजेता म्यान्चेस्टर सिटीले सहज जित निकालेको छ । शनिबार राति भएको खेलमा सिटीले वेस्टह्याम युनाइटेडलाई उसैको मैदानमा ३-१ गोलले हराएको हो ।
लन्डन स्टेडियममा सिटीलाई जिताउन हालान्डले तीन गोल गर्दा वेस्टह्यामका लागि सिटीकै रुबेन डियाजले गरेको आत्मघाती गोल सान्त्वना बन्यो ।
खेलको १०औं मिनेटमै हालान्डले सिटीलाई सुरुआती अग्रता दिलाएका थिए । तर, बल क्लियर गर्नेक्रममा सिटीका डियासले १९औं मिनेटमा आफ्नै पोस्टमा गोल गरेपछि वेस्टह्याम बराबरीमा फर्कियो ।
खेलको ३०औं मिनेटमा हाल्यान्डले दोस्रो गोल गर्दै सिटीको अग्रता बढाए । ८३औं मिनेटमा अर्को गोल गर्दै उनले ह्याट्रिक पूरा गरे । जारी लिगमा हाल्यान्डको यो दोस्रो ह्याट्रिक हो । उनले तीन खेलमा सात गोल गरिसकेका छन् ।यो जितसँगै सिटीले उपाधि रक्षा यात्रा थप मजबुत बनाएको छ । लगातार तीन जित निकालेको सिटी ९ अंकसहित शीर्ष स्थानमा उक्लिएको छ । समान खेलबाट तीन अंक बटुलेको वेस्टह्याम १४औं स्थानमा छ ।
