२१ भदौ, विराटनगर ।
पेरिस ओलम्पिकमा उपाधि भिडन्तमा पुगेपछि अयोग्य घोषित् भएकी भारतीय पहलवान (रेस्लर) विनेश फोगाट स्वदेश फर्किएर भारतीय कांग्रेसमा प्रवेश गरेकी छन् ।
१०० ग्राम तौल बढी भएको भन्दै फोगाटलाई फाइनल खेलअघि नै अयोग्य घोषित् गरिएको थियो । फाइनल पुग्दा पनि कांस्य पदक जित्नबाट बञ्जित बनेकी उनले कुस्तीलाई ‘अलबिदा’ गरेकी थिइन् ।
सन् २००१ देखि २०२४ सम्म २३ वर्ष कुस्तीमा बिताएकी उनै फोगाट शुक्रबार कांग्रेस पार्टीमा प्रवेश गरेकी हुन् । पार्टी प्रवेश गरेर राजनीतिमा आउनका लागि फोगाटले भारतीय रेलवेको जागिरसम्म छोडेकी छन् ।
जागिर छोडेपछि सामाजिक सञ्जाल ‘एक्स’ मा उनले लेखकी छन्, ‘भारतीय रेलवेको सेवा मेरो जीवनको एक यादपूर्ण र गौरवपूर्ण समय रह्यो । जीवनको यो मोडमा मैले स्वयम्लाई रेलवे सेवादेखि अलग राख्ने निर्णय लिँदै आफ्नो राजीनामा भारतीय रेलवेसक्षम दिएकी छु ।’ राष्ट्रको सेवामा रेलवेले मलाई दिएको यस अवसरका लागि म भारतीय रेलवे परिवारप्रति सदैव आभारी रहनेछु ।’
हरियाणा विधानसभा चुनावमा कांग्रेसबाट उनलाई टिकट मिल्ने चर्चा छ । रेस्लर बजरंग पुनियाका साथ विनेश कांग्रेस मुख्यालय पुगेर पार्टीको सदस्यता लिने बताइएको छ ।
यसअघि बुधबारमात्र सामाजिक सञ्जालमा कांग्रेस नेता राहुल गान्धी र बजरंग पुनियासँग साथ विनेश फोगाटको भेटघाट भएको तस्बिर बाहिरिएको थियो ।
आगामी अक्टोबर ५ मा हरियाणा विधानसभा चुनाव हुँदै छ ।
विनेश फोगाट अरू कोही नभएर आमिर खान अभिनित फिल्म ‘दंगल’ वास्तविक पात्र महावीरसिंह फोगाटका भाइ राजपाल फोगाटकी छोरी हुन् । महावीरसिंह फोगाट अर्जुन अवार्ड विजेता बबिता फोगाट र गीता फोगाटका बुबा हुन् । फोगाट परिवारका अधिकांश रेस्लर रहेका छन् ।
