२३ भदौ, दमक ।
झापाको दमकमा केही दिनअगाडि गर्भिणी गाईको हत्या गरेको अभियोगमा प्रहरीले एक महिलासहित चार जनालाई सार्वजनिक गरेको छ । भदौ १८ गते रातको समयमा दमक-१ स्थित पानीट्यांकी गोठमा बाँधी राखेको दुई महिनाको गर्भिणीसमेत रहेको गाईलाई खुल्ला चौरमा लगेर हत्या गरिएको थियो ।
मंगलबार राति दमक नगरपालिका-२ बस्ने ६७ वर्षीय लक्ष्मण विष्टको वडा नम्वर १ मा रहेको गोठबाट गाई चोरेर हत्या गरिएको थियो । गोठबाट अकलापुरी ग्रिन सिटी तथा विश्वकर्मामन्दिर प्रवेशद्वारको गेटबाट सय मिटरको दूरीमा गाईलाई मारिएको थियो ।
गाईगोठदेखि करिब १०० मिटर पूर्वतर्फ रहेको खाली प्लटिङ जग्गामा लगेर काटेर मासु लगेको उजुरीका आधारमा प्रहरीले अनुसन्धान थालेको थियो ।
गोठमा बाँधेको गाईलाई खाली प्लटिङ जग्गामा खुट्टा करङ तथा घाँटीको मासु काटेर लगिएको र शरीरको अन्य भाग मात्र घटना स्थलमा छाडिएको थियो । यस घटनाको अनुसन्धान गर्ने क्रममा प्रहरीले चार जनालाई शुक्रबार पक्राउ गरेर आज सार्वजनिक गरिएको हो ।
पक्राउ पर्नेमा दमक-२ बेलडाँगी स्थित भुटानी शरणार्थी शिविर क्याम्प नम्बर २ छाप्रो नम्बर ३३२ मा बस्ने ४४ वर्षीय प्रेमबहादुर विष्ट, क्याम्प नं. ३ छाप्रो नम्बर A3-२०८ बस्ने ३८ वर्षीय खगेन्द्र दुलाल, क्याम्प नं. ३ छाप्रो नम्बर A2- १२० बस्ने ३२ वर्षीय विधान थापा र दमक-४ बस्ने ४५ वर्षीय गीता श्रेष्ठ रहेका छन् ।
श्रेष्ठबाहेक अन्य तीन जना युवाहरू भुटानी शरणार्थी हुन् ।
जिल्ला प्रहरी कार्यालय झापाका प्रवक्ता डिएसपी कृष्णबहादुर चन्दका अनुसार पक्राउ परेका विष्ट उपर यसअघि पनि विभिन्न मितिमा चोरी, डाँका र केही सार्वजनिक अपराधमा कारबाही भएको छ ।
त्यस्तै दुलालउपर जबरजस्ती करणी र पशुपंक्षी सम्बन्धी कसुर कारबाही भएको थियो । अर्का भुटानी शरणार्थी थापाउपर विभिन्न मितिमा इलाका प्रहरी कार्यालय दमकबाट केही सार्वजनिक अपराधमा मुद्दा दर्ता भई कारबाही भएको पाइएको छ ।
घटनामा प्रयोग भएको खुकुरी, बन्चरो र मासु बोक्न प्रयोग गरेको झोला समेत उनीहरूको कोठाबाट बरामद गरिएको डिएसपी चन्दले बताए । पक्राउ परेका व्यक्तिहरूउपर पशुपक्षीसम्बन्धी कसुरमा अनुसन्धान अगाडि बढाइएको बताइएको छ ।
के छ कानुनी व्यवस्था ?
राष्ट्रिय जनावर गाईको हत्या गर्नेलाई कानुनले तीन वर्षसम्म कैदको सजाय तोकेको छ । मुलुकी अपराध संहिता २०७४ को परिच्छेद २७ मा यससम्बन्धी व्यवस्था छ । कसैले गाई वा गोरु मारे
को अदालतबाट ठहर भएमा उनीहरूलाई तीन वर्षसम्म कैद सजाय हुने व्यवस्था छ ।
