२३ भदौ, विराटनगर ।
भारतमा पनि एक जना मंकीपक्सका शंकास्पद बिरामी भेटिएका छन् । भारतीय मिडिया ‘अमर उजाला‘ का अनुसार विश्वभरि आतंक सिर्जना गरेको मंकीपक्सबाट संक्रमित भएका शंकास्पद बिरामी फेला परेका हुन् ।
भारतको केन्द्रीय स्वास्थ्य मन्त्रालयले ती बिरामीको अवस्था सामान्य रहे पनि आइसोलेसनमा राखेर उपचार भइरहेको जनाएको छ ।तथापि, शंकास्पद बिरामीबारे धेरै जानकारी दिइएको छैन ।
हाल उनी मंकीपक्सका लागि तोकिएको अस्पतालमा आइसोलेसनमा छन् । ती व्यक्तिले हालै मंकीपक्स संक्रमणबाट पीडित देशको यात्रा गरेको मन्त्रालयले जनाएको छ । मंकीपक्स हो या होइन निर्क्यौल गर्न बिरामीको नमुना परीक्षण गरिँदै छ ।
भारतीय स्वास्थ्य मन्त्रालयले ‘अलर्ट’ जारी गरेको छ । छिमेकी मुलुक भारतमा मंकीपक्स संक्रमणको आशंका गरिँदा नेपालमा पनि खतराको घण्टी बजेको छ । भारतसँग खुला सिमाना भएका कारण निर्वाध रूपमा आवत-जावत हुने हुँदा नेपालमा पनि सुरक्षा सतर्कता अपनाउन जरुरी देखिन्छ ।
