२६ भदौ, विराटनगर ।
आगामी दुई वर्षपछि क्यानडा, मेक्सिको र अमेरिकामा संयुक्त रूपमा आयोजना हुने फिफा विश्वकप फुटबलको छनोट खेलअन्तर्गत जापानले विपक्षीको पाेस्टमा गोल वर्षा गराउने क्रमलाई कायमै राखेको छ ।
मंगलबार राति भएको विश्वकपको एसियन छनोट खेलमा जापानले बहराइनमाथि ५-० गोलान्तरको फराकिलो जित दर्ता गरेको छ । तेस्रो चरणको खेलअन्तर्गत जापानले बहराइन उसैको मैदानमा हराएको हो ।
जापानको जितमा आयसे उएडा र हिडेमासा मोरिटाले दुई-दुई गोल गर्दा कोकी ओगावाले एक गोल गरे । त्यसअघि भने चीनलाई ७-० गोलले हराएको थियो सिरिया र म्यानमारमाथि समान ५-० गोलको नजिता निकालेको थियो ।
दोस्रो चरणमा शतप्रतिशत जित निकालेको जापान तेस्रो चरणका दुई खेलमा लगातार विजयी भएको छ ।विश्वकप खेल्न अहिले १८ एसियन राष्ट्रहरूले एकअर्कासँग प्रतिस्पर्धा गरिरहेका छन् । सन् २०२६ को विश्वकपमा ४८ टिमको सहभागिता रहने छ, जसमा एसियाका आठ टिम सीधै छनोट हुने छन् भने एक टिमले अन्तरमहादेशीय प्ले अफ खेल्न पाउने छ ।
एसिया छनोटका खेल १२ अक्टोबर २०२३ बाट सुरु भएको थियो । जम्मा ४८ टिमले छनोट खेल खेल्दा नेपालसहित २८ वटा टोली बाहिरिइसकेका छन् । एसियाबाट १८ नोभेम्बर २०२५ सम्ममा एसियाबाट विश्वकप खेल्ने सबै राष्ट्रको छिनोफानो लाग्ने छ ।
