३१ भदौ, काठमाडाैं ।
नेकपा एमालेका सांसद सूर्यप्रसाद ढकालले एकीकृत समाजवादीका उपमहासचिवसमेत रहेका सांसद मेटमणि चौधरीलाई देशद्रोही मुद्दा लगाउन माग गरेका छन् । सोमबार बसेको प्रतिनिधिसभा बैठकको आकस्मिक समयमा आफ्नो धारणा राख्दै उनले चौधरीले संविधानविरोधी र राष्ट्रघाती अभिव्यव्यक्ति दिएकाले कारबाही गर्नुपर्ने बताए ।
उनले भने, ‘एकजना पूर्वमन्त्री, पार्टीका पदाधिकारीले एउटा संचारमध्यममा आफ्नो विचार राख्ने सन्दर्भमा लिम्पियाधुरा र लिपुलेक भारतको हो । उसको दाबी पुग्छ भन्ने विचार व्यक्त गर्नुभयो । यो संविधानविरोधी र गैरजिम्मेवार अभिव्यक्तिप्रति खेद व्यक्त गर्न चाहन्छु । यो अभिव्यक्ति राष्ट्रघाती, देशद्रोही कुरा हो । राष्ट्रिय स्वतन्त्र र भौगोलिक अखण्डतालाई खण्डित गर्ने कुरा हो । तीन करोड जनतालाई अपमानित गर्ने कुरा हो । विदेशीलाई खुखी बनाउने कुरा हो ।’
सांसद ढकालले संसद्बाट सर्वसम्मत पास भएर संविधानको अनुसूचीमै लिम्पियाधुरा र लिपुलेक नेपालको भूभाग भएको स्पष्ट भएपनि त्यसविरुद्ध त्यसरी बोल्नेलाई देशद्रोहीको मुद्दा लगाउन माग गरेका छन् । ‘संसद्बाट सर्वसम्मत पास भई संविधान संशोधन गरेर अनुसूचीमा उल्लेख भएको विषयलाई यो नेपालको भूभाग होइन भनेर अभिव्यक्ति दिनेलाई देशद्रोहीको मुद्दा लगाइयोस्,’ उनले भनेका छन् ।
