५ असोज , काठमाण्डौ।
नेपाल प्रिमियर लिगको अक्सनका लागि खेलाडी दर्ता प्रकृया खुला भएको छ । आयोजक नेपाल क्रिकेट संघ (क्यान)ले अक्सनमा सहभागी हुन चाहने नेपाली खेलाडीहरूका लागि दर्ता प्रकृया खुला गरेको हो । क्यानले शनिबार प्रेस विज्ञप्ति मार्फत दर्ता खुल्ला गरेको हो ।
प्रतियोगिता नोभेम्बर ३० देखि डिसेम्बर २१ सम्म काठमाडौंमा हुनेछ । अक्सनमा सहभागी हुन चाहने खेलाडीले अनलाइन मार्फत नाम दर्ता गर्न सक्नेछन् । अक्सनमा सहभागी हुन चाहने नेपाली खेलाडीहरूले https://npl-t20.com/registration लिंकमार्फत आफ्नो नाम दर्ता गराउनुपर्नेछ ।
अक्सन प्रकृयामा सहभागी हुने खेलाडीहरुलाई ए, बी, सी गरी तीन श्रेणीमा विभाजन गरिएको हुँदा खेलाडीहरूले आफ्नो इच्छा अनुरुप कुनै पनि श्रेणीमा नाम दर्ता गर्न सक्नेछन् । दर्ता शुल्क प्रति खेलाडी एक हजार तोकिएको छ ।
दर्ता गर्ने अन्तिम समय असोज १२ गते सम्म रहेको क्यानका प्रवक्ता छुम्बी लामाले जानकारी दिए । ए ग्रेडका खेलाडीको न्यूनतम मूल्य १० लाख रुपैयाँ तोकिएको छ । उक्त मूल्य बढीमा १५ लाखसम्म जानेछ ।
एउटा ए ग्रेडको खेलाडीलाई १५ लाखसम्म एक भन्दा बढी टोलीको बोली लागेको खण्डमा चिट्ठा थुतिने क्यानका प्रबक्ता छुम्बी लामा बताउँछन् । बी ग्रेडका खेलाडीको न्यूनतम मूल्य ५ लाख राखिएको छ । बी ग्रेडका खेलाडीको उच्चतम मूल्य १० लाख सम्म पाउनेछन् ।
१० लाख भन्दा बढी भएमा चिट्ठा थुतिनेछ । त्यस्तै सी ग्रेडका खेलाडीको न्यूनतम मूल्य २ लाख राखिएको छ । बढीमा ५ लाखसम्म जानेछ । त्यसपछि चिट्ठा थुतिनेछ । एनपीएलमा काठमाडौं, पोखरा, चितवन, विराटनगर, जनकपुर, लुम्बिनी, सुदूरपश्चिम र कर्णाली गरी आठ टोली छन् ।
दसैंअघि नै खेलाडीको अक्सन हुने बताइएको छ । यसअघि क्यानले ८ मार्की खेलाडी घोषणा गरिसकेको छ । ती बाहेकका खेलाडीलाई अक्सनमार्फत छानिनेछ । विदेशी खेलाडी भने टिमहरुले सम्झौता गरेर सिधै अनुबन्धन गर्न पाउने छन् ।
