६ कार्तिक , एजेन्सी ।
विश्व फुटबलमा सर्वाधिक गोलकर्ता हुन्, पोर्चुगलका कप्तान क्रिस्टियानो रोनाल्डो । आगामी फेब्रुअरीबाट उमेरले ४० पुग्न लागेका रोनाल्डोले उत्कृष्ट प्रदर्शनबाट आलोचकलाई जबाफ दिइरहेका छन् । अहिले साउदी अरेबको अल नासरबाट व्यवसायिक फुटबल खेलिरहेका उत्कृष्ट लयका साथ खेल्दै आफूलाई अब्बल साबित गर्नमा कुनै कसर बाँकी राखेका छैनन् ।
सन् २००३ मा पोर्चुगलबाट डेब्यु गरेका रोनाल्डोले हालसम्म देश र क्लबका लागि जम्मा एक हजार २४५ खेलमा ९०७ गोल गरेका छन् । आफ्ना प्रतिद्वन्द्वी मानिने लियोनल मेसीलाई उनले ५८ गोलले उछिनेका छन् । अर्जेन्टिनी स्ट्राइकर मेसीले एक हजार ७८ खेलमा ८४९ गोल गरेका छन् ।
तर, पेनाल्टीबाहेकका गोलमा भने ३७ वर्षीय मेसीले आफूभन्दा दुई वर्ष जेठा रोनाल्डोलाई उछिनेका छन् । पेनाल्टीबाहेक मेसीले ७४० गोल गरेका छन् भने रोनाल्डोले ७३९ गोल गरेका छन् । क्लबका लागि पेनाल्टीबाहेकका गोल जोड्दा मेसी २६ गोलले अगाडि छन् ।
बार्सिलोना, पिएसजी र इन्टर मियामीबाट मेसीले पेनाल्टीबाहेकका ६५२ गोल गरेका छन् । युरोपका पाँच शीर्ष डिभिजन लिगमध्ये तीन वटामा अनुभव संगालेका रोनाल्डोले पेनाल्टीबाहेक ६२६ गोल गरेका छन् ।
तथापि, अन्तर्राष्ट्रिय खेलमा भने पेनाल्टीबाहेकका गोलमा विश्वकप विजेता मेसीभन्दा रोनाल्डो नै अगाडि छन् । रोनाल्डोले पोर्चुगलका लागि पेनाल्टीबाहेक ११३ गोल गरेका छन् भने मेसीले अर्जेन्टिनाका लागि पेनाल्टीबाहेक ८८ गोल गरेका छन् ।
रोनाल्डोभन्दा एक वर्षपछि अर्जेन्टिनाका लागि डेब्यु गरेका मेसीले राष्ट्रका लागि १८९ खेलमा ११२ गोल गरेका छन् । मेसीले अर्जेन्टिनालाई एक पटक विश्वविजेता बनाएका छन् भने दुई पटक कोपा अमेरिकाको उपाधि दिलाएका छन् ।
रोनाल्डोले भने पोर्चुललाई एक–एक वटा नेसन्स लिग र युरो कपको उपाधि दिलाएका छन् । पाँच पटकका बालोन डी‘ओर विजेता रोनाल्डोले २१६ खेलमा १३३ गोल गरेका छन् । पछिल्लो दुई दशकयता विश्व फुटबलमा राज गरिरहेका दुवै जना आ–आफ्नो राष्ट्रका सर्वाधिक गोलकर्तासमेत हुन् ।
सर्वाधिक धेरै आठ पटकका बालोन डी‘ओर विजेता मेसीले अहिलेसम्म १४० पटक पेनाल्टी प्रहार गर्दा १०९ गोल गरेका छन् । मेसीका ३१ पेनाल्टी भने ‘मिस’ भएका छन् । रोनाल्डोले भने १९८ पटक पेनाल्टी हान्दा १६८ गोल गरेका छन् ।
पेनाल्टी ‘मिस’ गर्ने विषयमा रोनाल्डो अलि पछि नै छन् । रोनाल्डो हालसम्म प्रहार गरेका ३० वटा पेनाल्टी असफल बनेका छन् । फ्रिकिकबाटै गोल गर्ने मामलामा पनि मेसी नै अगाडि छन् । मेसीले जम्मा ६६ पटक फ्रिकिकबाट सीधै गोल गरेका छन् भने रोनाल्डोले ६४ गोल फ्रिकिकबाटै गरेका छन् ।
ह्याट्रिक गोल गर्ने सिलसिलामा भने रोनाल्डो अगाडि छन् । हालसम्म रोनाल्डोले ६६ पटक ह्याट्रिक गर्दा मेसीले ५९ पटक ह्याट्रिक गोल गरेका छन् । तथापि, अन्तर्राष्ट्रिय खेलमा भने उनीहरूले बराबरी १०–१० पटक ह्याट्रिक गोल गरेका छन् ।
उपाधि संख्याको कुरा गर्ने हो भने मेसी सर्वाधिक धेरै ४६ वटा ट्रफी जित्ने खेलाडी हुन् । जबकि, रोनाल्डोसँग ३४ वटा ट्रफी छन् । फोर्ब्सले सार्वजनिक गरेको तथ्यांक हेर्दा रोनाल्डो सर्वाधिक धेरै कमाउने खेलाडी हुन् ।
खेलाडीले क्लबसँग गरेको सम्झौताअनुसार पाउने तलब, बोनस, इमेज राइट्स, स्पोन्सरलगायतबाट जोडेर वार्षिक आम्दानी गणना गर्दा रोनाल्डोले यस वर्ष कुल २८५ मिलियन अमेरिकी डलर आम्दानी गरेका हुन् ।
जबकि, मेसी सर्वाधिक धेरै कमाउने खेलाडीको सूचीमा दोस्रो स्थानमा छन् । मेसीको कमाइ १३५ मिलियन डलर छ । मेसीको मैदानभित्रको कमाइ ६० मिलियन डलर छ भने स्पोन्सरबाट ७५ मिलियन डलर कमाउँछन् ।
