८ कार्तिक , काठमाण्डौ ।
सहकारी वचतको रकम अपचलनको अभियोगमा रविमाथि अनुशन्धानका लागि अदालतले दिएको ६ दिनको म्याद सकिएपछि उनलाई म्याद थपका लागि अदालतमा उपस्थित गराइएको छ ।
पोखरास्थित सूर्यदर्शन सहकारीको रकम हिनामिना प्रकरणमा पक्राउ परेका रास्वपा सभापति रवि लामिछाने र पूर्व डीआईजी छविलाल जोशीलाई कास्की जिल्ला अदालतमा उपस्थित गराइएको छ ।
ढिला गर्दा प्रदर्शन र भिडले असहज हुन सक्ने भएकाले कार्यालय खुलेसँगै अदालतमा उपस्थित गराइएको प्रहरी स्रोतले बताएको छ । गत शुक्रबार काठमाडौंमा लामिछानेलाई पक्राउ गरी सोही रात पोखरा ल्याएर आइतबार अदालतमा उपस्थित गराउँदा पक्राउ परेकै दिनदेखि लागु हुने गरी अनुसन्धानका लागि ६ दिनको म्याद दिइएको थियो।
पोखराको सूर्यदर्शन सहकारीको रकम गोर्खा मिडियामार्फत अपचलन गरेको अभियोगमा उनलाई सहकारी ठगी तथा संगठित अपराधको मुद्दा लगाइएको छ । सोही मुद्दामा पहिलो पटक दिइएको म्याद सकिएपछि प्रहरीले आज फेरि उनलाई अदालतमा उपस्थित गराइएको हो ।
गत असोज ६ गते नै पक्राउ परेर पोखरा ल्याइएका गोर्खा मिडिया प्रालिका पूर्वसञ्चालक तथा पूर्व डिआइजी छविलाल जोशीलाई पनि आजै अदालतमा उपस्थित गराइएको हो । तर ६ दिनको अवधिमा उनलाई प्रहरीले अनुशन्धानका क्रममा सोध्नु पर्ने विषय सोधेर बयान सक्नुपर्नेमा लम्ब्याउने प्रयास गरेको स्वयम रवि र उनको दल राष्ट्रिय स्वतन्त्र पार्टी रास्वपाले आरोप लगाएको छ ।
सरकारले राजनीतिक प्रतिशोध साँधेर रविलाई पक्राउ गरेको आरोपमा पोखरामा प्रर्दशन गरिरहेको रास्वपाले समेत त्यो आरोप अहिले पुष्टि भएको बताएको छ । विहीबार बिहान पोखरामा पत्रकार सम्मेलन गरेर रास्वपा उपसभापति स्वर्णिम वाग्लेले १२५ घण्टा हिरासतमा राख्दा ४–५ घण्टामात्र बयान लिइएको भन्दै वाग्लेले भने, ‘मानमर्दन गर्ने, अपमान गर्ने जुन शैलीमा सरकार प्रस्तुत भएको छ यसको एउटै मकसद के हो त तेरो सेखी झार्छु, देखाइदिन्छु भन्ने शैलीमा सरकार प्रस्तुत भएको छ ।’
उनले थप भनेका छन्, ‘यसलाई सभ्य भाषामा राजनीतिक प्रतिशोध नै भनिन्छ । र, त्यो राजनीतिक प्रतिशोध नै साँधेको हो भन्ने राष्ट्रिय स्वतन्त्र पार्टीको दाबीलाई हिजोको पछिल्लो वस्तुस्थितिलाई पुष्टि गरेको छ ।’
यस्तै कास्की प्रहरी हिरासतमा रहेका रवि पनि यसपटक लामै समय हिरासत बस्नुपर्ने, नभए पुर्पक्षका लागि कारागार नै पठाउने हो कि भन्ने भयमा देखिएको उनलाई भेटेकाहरु बताउँछन् । यसअघि सहकारी अपचलनको अभियोगमा पक्राउ परेका अधिकांशलाई पुर्पक्षका लागि पठाइएको अवस्थाले पनि रविमा भय देखिएको छ ।
छानविन समितिले रवि, छवि र गोर्खा मिडियाकै सञ्चालक तथा सूर्यदर्शन सहकारीका कोषाध्यक्ष कुमार रम्तेललाई पनि कारबाहीका लागि सिफारिस गरेको थियो । रम्तेल पनि पुर्पक्षका लागि कास्की कारागारमै छन् ।
आफूलाई भेट्न आएका रास्वपाकै नेताहरुसँग पनि रविले आफूलाई हिरासतमै राख्नका लागि फेरि म्याद थप्ने गरी बयान लिइएको बताएका छन् । प्रहरीले बयान लागि बोलाएर २÷३ वटामात्रै प्रश्न सोध्ने र ती सबै पहिले नै जवाफ दिइसकेको प्रश्न रहेको रविले आफ्ना नेता तथा कानुनी प्रतिनिधिहरुलाई बताएका छन् ।
यसैबीच पार्टी सभापति रवि लामिछाने पक्राउ परेपछि पोखरा केन्द्रित आन्दोलन गर्दै आएको रास्वपाले अब काठमाडौँमा आन्दोलन गर्ने भएको छ । पार्टी सभापति लामिछानेमाथि अनुसन्धान प्रक्रिया चलिरहँदा गत ६ दिनयता रास्वपाले पोखरा केन्द्रित विरोध प्रदर्शनका कार्यक्रम गर्दै आएकोमा शुक्रबारदेखि भने काठमाडौँमा प्रदर्शन गरिने प्रदेश सभापति राजन गौतमले बताएका छन् । गौतमले बिहीबारको पत्रकार सम्मेलनमा भने, ‘हामी आन्दोलनलाई अब काठमाडौँ केन्द्रित गर्छौँ । पोखराको आन्दोलन आज अन्तिम हो ।’
