१३ मंसिर , काठमाण्डौ ।
काठमाडौँको कालीमाटीस्थित सडकमा मृत भेटिएकी ४५ वर्षीया जानुका सुर्खेतीको पोस्टमार्टम रिपोर्ट आएको छ । त्रिवि शिक्षण अस्पतालका फरेन्सिक चिकित्सकले गरेको शव परीक्षण रिपोर्टअनुसार उनको हत्या नभएर लिभरको समस्याका कारण मृत्यु भएको देखिएको छ ।
यसअघि यो प्रकरणमा एक युवक हत्याको अभियोगमा प्रहरी अनुशन्धानमा रहेका छन् ।अनुसन्धानमा संलग्न प्रहरी अधिकारीका अनुसार पोस्टमार्टम रिपोर्टमा उनको मृत्युको कारणबारे लेखिएको छ, ‘डिजिज अफ द लिभर ।’
मङ्सिर ७ मा उदयपुर घर भएकी ४५ वर्षीया सुर्खेतीको शव कालीमाटीको सङ्गीत मार्गमा फेला परेको थियो । उनको शव बोकेर हिँड्ने बझाङ घर भएका २२ वर्षीय कवीन्द्र बोहरालाई पक्राउ गरेर प्रहरीले अनुसन्धान गरिरहेको छ ।
उनलाई प्रहरी वृत्त कालीमाटीले अदालतबाट म्याद लिएर हिरासतमा राखेको छ । बोहराले शव काँधमा बोकेर सडकमा फालेका हुन् । लागुऔषध सेवनकर्ता कवीन्द्र बोहरालाई प्रहरीले चप्पलबाट पहिचान गरेको थियो ।
क्लोज सर्किट टेलिभिजन (सीसीटिभी) क्यामेरामा देखिएको उनको चप्पलको सङ्केतबाट उनलाई पक्राउ गरिएको प्रहरी अधिकारीहरुले बताएका छन् । सुर्खेतीको हत्यामा संलग्न आशंकामा पक्राउ गरिएका युवक यसअघि पनि धेरै पटक अपराधमा संलग्न भएर पक्राउ परेका थिए ।
यसअघि उनी १० पटक पक्राउ परेका थिए । २०७७ चैतमा प्रहरी बृत्त जनसेवाले उनीविरुद्ध अभद्र व्यवहार मुद्दा चलाएको थियो । २०७८ वैशाख र भदौमा प्रहरी वृत्त कालीमाटीमा, २०७९ वैशाखमा बझाङमा, २०७९ असारमा कालीमाटीमा र २०८० जेठमा उनी सिंहदरबार वृत्तमा थुनामा परेका थिए ।
२०८१ कार्तिकमा उनलाई चोरी तथा डाँका मुद्दामा प्रहरी वृत्त कालीमाटीले नै पक्राउ गरेर अनुसन्धान गरेको थियो । २०८१ वैशाख र भदौमा उनी अभद्र व्यवहार सम्बन्धी कसुरमा पक्राउ परेका थिए ।
उनले सुर्खेतीको शव बोकेको स्वीकार गरे पनि हत्या अस्वीकार गरेका छन् । उनले भनेअनुशार नै अहिले पोस्टमार्टम रिपोर्टमा पनि उनको मृत्युको कारण हत्या नभएर लिभरको समस्या भनिएको छ।
