एजेन्सी,असोज ११
बलिउड सुपरस्टार अमिताभ बच्चन र आमरि खानले पहिलो पटक स्क्रिन साझेदारी गरेको चलचित्र ‘ठग्स अफ हिन्दोस्तान’ को ट्रेलर सार्वजनिक भएको छ । लामो समयदेखि व्यग्रताका साथ प्रतिक्षामा रहेको सो चलचित्रको ट्रेलर बिहीबार सार्वजनिक गरिएको हो ।
यशराज फिल्म्सले निर्माण गरेको चलचित्रको ट्रेलर एक्सन र दमदार डाइलगबाट भरपूर छ । ट्रेलरमा भिएफएक्स जबर्जस्त देखिएको छ । ठूला–ठूला जहाज र कलाकारको लुक्सको अन्दाजले ‘बाहुबली’ को ग्रान्ड स्टाइलको याद दिलाउन सक्छ ।
दिपावलीको अवसर पारेर ८ नोभेम्बरमा रिलिज हुन लागेको यो फिल्म फिलिप टेलर्सको उपन्यास ‘कन्फेशन अफ ठग्स’ मा आधारित छ । विजय कृष्ण आचार्यले निर्देशन गरेको सो चलचित्र तीन भाषामा रिलिज हुनेछ ।
हिन्दीसँगै फिल्मलाई तमिल र तेलुगूमा पनि डब गरिएको छ । चलचित्रमा अमिताभ बच्चन (खुदाबक्श), आमिर खान (फिरंगी), फातिमा सना शेख जफीर), कटरीना कैफ (सुरैया) र लायड (जोन क्लाइव) को भूमिकामा छन् ।
‘ठग्स अफ हिन्दोस्तान’ को बजेट २ करोड १० लाख बताइएको छ । यो यशराज ब्यानरको सबैभन्दा महँगो फिल्म हो । यो पहिलो फिल्म हो जुन ठगको जिन्दगीलाई पर्दामा देखाइदैछ ।
