५ पुष , काठमाण्डौ ।
राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेको हिरासतमा रहेको तस्बिर सार्वजनिक भएपछिको कम्पन अझै कम भएको छैन् । हिरासतको फोटो आफूले खिचेको र सामाजिक संजालमा सार्वजनिक गर्नु गम्भिर गल्ती भएको भन्दै रविका समर्थक नै रहेका डा निकोलस भुसालले माफी मागेका छन् भने कास्की प्रहरीले अनुसन्धान जारी रहेको भन्दै फोटो खिच्ने रसार्वजनिक गर्नेमाथि कारबाही गर्ने बताएको छ ।
तर सुरुमा उक्त तस्बिर सार्वजनिक गर्ने तथा त्यो आफैँले खिचेको दाबी गर्ने लामिछानेका समर्थक डा. निकोलस भुसाल र आफूबीचको नक्कली च्याट बनाउनेविरुद्ध रास्वपाका सहकोषाध्यक्ष दीपक बोहराले साइब्युरोमा निवेदन दिएका छन् ।
उनले सामाजिक सञ्जालमार्फत भिडिओ सन्देश जारी गर्दै निकोलस र आफूबीच च्याटमा कुराकानी भएको भनी फेक च्याट बनाएर अहिले सामाजिक सञ्जालमा भाइरल बनाइएको बताएका हुन्। निकोलसलाई आफूले नभेटेको नै ७ महिना भइसकेको र यसबीच कुनै सम्पर्क नभएको उनले दावी गरेका छन्।
यसैले यसविरुद्ध आफूले नेपाल प्रहरीको साइबर ब्युरोमा उजुरी दिएको उनले उल्लेख गरेका छन्। ‘हिजोदेखि निकोलस भुसाल र मबीच कुरा भयो भनेर एउटा फेक च्याट गरेको स्क्रिनसट भाइरल छ। यो के हो भनेर धेरैले मलाई म्यासेज गरिरहेका छन्। बिहान मलाई डोनाल्ड ट्रम्पले गुडमर्निङ भनेको, नरेन्द्र मोदीले कैसे हो भाइ भनेको, केपी ओलीले के छ दीपक भनेको च्याटको स्क्रिनसट मसँग छ। भनेको यसरी फेक च्याट बनाउन मिल्छ। तर फेक च्याट बनाउनेहरूलाई त्यो साइबर कानुन आकर्षण हुन्छ’, भिडिओमा बोहराले भनेका छन्, ‘निकोलस भाइ मैले नभेटेकै ७ महिना भाको होला। निकोलस पोखरा आकै मलाई थाहा छैन। ऊ रवि दाइलाई भेट्न गाको पनि मलाई थाहा छैन। ऊ भेटेर गयो कि नेभटी गयो कि मलाई थाहा छैन। नत्र म फोटो खिच भन्थेँ। फेक च्याट भाइरल बनाउनेहरूलाई लागि मैले साइबर ब्युरोमा जानकारी गराको छु र निवेदन पनि पठाएको छु।’
रविको फोटो भाइरल भएपछि दीपक र निकोलसको भनिएको च्याट सार्वजनिक गरिएको छ ।लामिछानेको फोटो सार्वजनिक गर्ने डा. निकोलास भुसाललाई भने जिल्ला प्रहरी कार्यालय कास्कीले कारवाही गर्ने भएको छ ।
बिहीबार प्रेस विज्ञप्ती जारी गर्दै अनुसन्धानलाई नकरात्मक प्रभाव पार्ने गरी फोटो प्रकाशित भएको भन्दै प्रहरीले ध्यानाकर्षण भएको जनाएको छ । प्रहरीले फोटो सार्वजनिक गर्ने व्यक्तिलाई कारवाही गर्ने उल्लेख गरेको छ ।
‘‘प्रकाशन तथा सम्प्रेषण गर्ने कार्यमा संलग्न रहेका जो कोही व्यक्तिलाई पनि कानूनी दायरामा ल्याई कानून बमोजिम अनुसन्धान तथा कारवाही गरिने र नेपालको संविधान एवं प्रचलित ऐन कानून बमोजिम फौजदारी न्याय प्रणालीका मुल्य मान्यताको अनुसरण गर्दै तथ्य एवं प्रमाणमुखी अनुसन्धान गर्न जिल्ला प्रहरी कार्यालय कास्की सदैव प्रतिवद्ध रहेको व्यहोरा अनुरोध गर्दछौं,’ विज्ञप्तीमा भनिएको छ ।
‘सूचनाको हक सम्बन्धी ऐन, २०६४ मा व्यवस्था भए बमोजिम अपराध अनुसन्धान, तहकिकात तथा अभियोजनमा गोपनियता कायम गर्नुपर्ने व्यवस्था र प्रचलित साइबर अपराध सम्बन्धी कानुनी प्रावधानलाई समेत उल्लंघन गरी अनधिकृत रूपमा सामग्री प्रकाशन तथा सम्प्रेषण गर्ने कार्यमा संलग्न रहेका जो कोही व्यक्तिलाई पनि कानुनी दायरामा ल्याई कानुन बमोजिम अनुसन्धान तथा कारबाही गरिने,’ प्रहरी नायव उपरीक्षक एवं प्रवक्ता बसन्तकुमार शर्माले विज्ञप्तिमा उल्लेख गरेका छन् ।
प्रहरीले उक्त तस्वीर डा. निकोलस भुसालको फेसबुक पेजबाट प्रकाशित भएको पनि बताएको छ । उक्त तस्वीर सार्वजनिक भएकोप्रति ध्यानाकर्षण गराउँदै प्रहरीले फौजदारी न्याय प्रणालीका मूल्य मान्यताको अनुसरण गर्दै तथ्य एवं प्रमाणमुखी अनुसन्धान गर्न प्रतिबद्ध रहेको पनि बताएको छ ।
