७ फागुन , एजेन्सी ।
अमरिकी राष्ट्रपति डोनाल्ड ट्रम्पको महत्वकाक्षी अवैध आप्रवासन निकाला गर्ने नीति अनुरुप अमेरिकाबाट देश निकालामा पर्नेमा ३ जना नेपाली समेत परेका छन् । अमेरिकाले नेपाली लगायतका ११९ जना व्यक्तिहरूलाई पनामा डिपोर्ट गरेकोमा त्यसमा ३ जना नेपालीहरु रहेको खुलासा भएको छ ।
ट्रम्प प्रशासन र मध्य अमेरिकी राष्ट्र पनामा बीचको सम्झौता अनुशार उनीहरुलाई पनामा डिपोर्ट गरिएको हो । पनामाको विदेश मन्त्रालयका अनुसार ११९ जनामा सबैभन्दा धेरै भारतका ३५, चीनका ३३, उज्वेकिस्तानका १९, इरानका १२, भियतनामका ९, नेपालका ३, टर्कीएका ३, अफगानिस्तानका २, पाकिस्तानका २ र श्रीलंकाका १ जना रहेका छन् ।
केही नाबालिगहरू आमाबाबुसँग यात्रा गरिरहेका थिए। देशनिकालामा परेकामध्ये ८२ पुरुष र ३७ महिला रहेका छन् । अमेरिकाबाट पनामाका लागि गरिएको आप्रवासीको पहिलो उडानमा अफगानिस्तान, चीन, भारत, इरान, नेपाल, पाकिस्तान, श्रीलंका, टर्कीए, उजबेकिस्तान र भियतनामका मानिसहरू रहेको र अरू दुई उडान पनि चाँडै अवतरण गर्ने पनामाका राष्ट्रपति जोस राउल मुलिनोले बताएका छन् ।
आगामी उडानमा नेपाली हुने नहुने केही खुलेको छैन । अमेरिकाले तीन उडानमा ३६० जना आप्रवासीहरूलाई पनामा पठाउनेछ। त्यसमा कतिजना नेपालीहरु हुनेछन् भन्ने प्रष्ट छैन । देशनिकाला गरिएका व्यक्तिहरूलाई डेरियन नजिकैको आश्रय स्थलमा स्थानान्तरण गरिनेछ ।
जुन मध्य अमेरिकालाई दक्षिण अमेरिकासँग जोड्ने जंगली इलाका हो । अनगिन्ती आप्रवासीहरूले यसलाई पार गर्दै अमेरिकामा प्रवेश गर्ने प्रयास गर्छन्। यस महिनाको शुरुमा अमेरिकी विदेशमन्त्री मार्को रुबियोसँगको वार्तामा मुलिनोले पनामा नहरको सार्वभौमित्वमा कुनै बहस नगर्ने कुरा जोड दिएका थिए ।
पनामा र अमेरिकाबीचको द्विपक्षीय सहकार्यको कारणले जनवरी महिनामा डेरियनबाट क्रस गर्ने आप्रवासीहरूको प्रवाह अघिल्लो वर्षको सोही महिनासँगको तुलना गर्दा ९० प्रतिशत ले घटेको छ । डेरिएन ग्याप, जसले पानामा र कोलम्बियालाई विभाजन गर्छ, मध्य अमेरिकाबाट हुँदै अमेरिका जाने आप्रवासीहरूको लागि यो व्यस्त मार्ग बनेको छ।
सन् २०२३ मा, ५ लाखभन्दा बढी आप्रवासीहरू, मुख्यतः भेनेजुएलाबाट, डेरिएन जंगल पार गरेर पानामा प्रवेश गरेका थिए। गत वर्ष (२०२४) यो सङ्ख्या घटेर ३ लाख मा सीमित भएको थियो । एल साल्भाडोर र ग्वाटेमालाले यस्तै व्यवस्था प्रस्ताव गरेपछि अमेरिकाबाट निष्कासन गरिएका अन्य देशका आप्रवासीहरूलाई स्वीकार गर्ने पनामा पछिल्लो मध्य अमेरिकी राष्ट्र हो।
