विराटनगर,१७ असोज
नेपालमै पहिलो प्रादेशिक पुँजी बजार प्रदर्शनी विराटनगरमा आयोजना हुने भएको छ । विश्व लगानीकर्ता सप्ताहको अवसर पारेर यही असोज १९ र २० गते पहिलो प्रादेशिक पुँजी बजार प्रदर्शनी आयोजना गर्न लागिएको नेपाल धितोपत्र बोर्डले जनाएको छ ।
मंगलबार विराटनगरमा आयोजना गरेको पत्रकार सम्मेलनमा बोर्डका अध्यक्ष रेवतबहादुर कार्कीले नेपालमै पहिलोपटक शेयर जारी गर्ने विराटनगर जुटमिल्स यहाँ रहेकाले उपत्यका बाहिर पुँजी बजार प्रदर्शनीका लागि विराटनगरलाई रोजेको जानकारी दिए । पुँजी बजारको प्रबद्र्धन र जनचेतना अभिबृद्धिका लागि प्रादेशिक पुँजी बजार प्रदर्शनी गर्न लागिएको उनले बताए ।
स्थानीय जैन भवनमा आयोजना गरिने प्रदर्शनीमा धितोपत्रसँग सम्बन्धित १ सय २० स्टल रहने छन । प्रदर्शनीमा ब्रोकर व्यवसायी, मर्चेन्ट बैंकर,आश्वा सदस्य बैंक,नेपाल धितोपत्र बोर्ड, नेपाल स्टक एक्सचेन्ज , निक्षेप सदस्यहरूलगायतको स्टल रहनेछ । औद्योगिक नगरी विराटनगरका उद्योगहरूलाई पनि पँजी बजारमा आकर्षित गरी रियल सेक्टरलाई बजारमा भित्राउने उद्देश्य राखेको वोर्डले जनाउको छ ।
प्रदर्शनीमा विद्यार्थीहरू तथा शेयर बजारमा लगानी गर्न चाहनेहरूलाई लक्षित गरी शेयर बजारबारे आधारभूत तालिमसमेत दिने योजना बोर्डले बनाएको छ ।
