८ चैत , काठमाण्डौ ।
सुनसरीको दुहबीमा स्वास्थ्य क्षेत्र सुधारका लागि कुटनैतिक नियोगका अधिकारीसहित उच्चस्तरीय छलफल सम्पन्न भएको छ।
मेयर बेद नारायण गच्छादार नेतृत्वमा भएको उक्त अन्तरक्रियामा प्रदेश स्वास्थ्य मन्त्रालय कोशी, ब्रिटिश राजदूतावास काठमाडौं तथा करुणा फाउन्डेशन का स्वास्थ्य विज्ञहरूको सहभागिता रहेको थियो।
छलफलमा आधारभूत अस्पताल सञ्चालन, स्वास्थ्य जनशक्ति व्यवस्थापन, सेवा गुणस्तर अभिवृद्धि तथा दीर्घकालीन रणनीतिक योजना निर्माणका विषयमा गहन बहस भएको थियो।
स्विपर र एम्बुलेन्स चालकदेखि विशेषज्ञ चिकित्सकसम्मको उचित व्यवस्थापन, दक्षता र प्रेरणासहित गुणस्तरीय सेवा प्रवाहमा जोड दिइएको थियो।
नगरप्रमुख गच्छादारले संघीय सरकारको वर्तमान दरबन्दी र बजेट अपर्याप्त रहेको उल्लेख गर्दै स्वास्थ्य क्षेत्रमा ठूला चुनौती रहेको बताए।
उनले जनसंख्या र भौगोलिक अवस्थाअनुसार दरबन्दी वृद्धि, स्वास्थ्य बीमा भुक्तानी सुधार, पोषण कार्यक्रम प्रभावकारी बनाउने र अस्पताल फोहोर व्यवस्थापनमा सरकारको स्पष्ट प्रतिबद्धता आवश्यक रहेको बताए।
उनले दीर्घकालीन समाधानका लागि पब्लिक–प्राइभेट पार्टनरसिप पीपीपी मोडल अपनाउनुपर्ने, स्वास्थ्यकर्मीलाई न्यूनतम न्यायोचित तलब सुनिश्चित गर्नुपर्ने र शिक्षा भन्दा स्वास्थ्य क्षेत्रमा बढी लगानी गर्नुपर्ने धारणा समेत राखे।
यस्तै प्रमुख प्रशासकीय अधिकृत सुवर्ण घिमिरेले आधारभूत अस्पताल सञ्चालनका लागि आवश्यक मापदण्ड पूरा गर्न कम्तीमा दुई जना चिकित्सक, स्त्रीरोग तथा बालरोग विशेषज्ञ र मिनी अपरेशन सेवा अनिवार्य गर्नुपर्ने सुझाव दिए।
विज्ञ टोलीले पोषण, स्वच्छ पानी र बाल स्वास्थ्यलाई प्राथमिकतामा राख्दै ‘प्रोएक्टिभ’ स्वास्थ्य योजना आवश्यक रहेको औंल्याउँदै दुहबीको पहललाई स्वागतयोग्य बताएका छन्।
साथै मन्त्रालयमार्फत सरकारको ध्यानाकर्षण गराउने प्रतिबद्धता व्यक्त गरेका छन्।
छलफलपछि विज्ञ टोलीले दुहबी नगर आधारभूत अस्पतालको निरीक्षण समेत गरेको छ।
छलफलमा मेयर गच्छादारसहित प्रदेश स्वास्थ्य मन्त्रालय कोशीका बिज्ञ डाक्टर सुरेस मेहेता, बेलायतती राजदुतावास काठमाडौंका स्वास्थ्य बिज्ञ डा. दिपक कार्की, डा. सन्जय नायक , डा. माइकल ओङ, उपमेयर मेनुका खतिवडा लगायतको सहभागिता रहेको थियो ।
