विराटनगर , असोज २६
नेपालले टी २० विश्वकप क्रिकेटको एसिया छनोट ‘बी’को उपाधि जितेको छ । शुक्रबार सिंगापुरलले नेपाललाई मात्र ८२ रनको लक्ष्य दिएको थियो । तर, नेपालले मात्र ३ बलमा एक विकेट गुमाएर १ रन बनाउँदा पानी परेपछि खेल रोकिएको थियो ।
लगातारको वर्षाका कारण खेल हुन नसकेपछि रन रेटका आधारमा नेपाल विजेता बनेको हो । भारी वर्षाका कारण ट्रफी प्रिजेन्टेसनसमेत हुन सकेन । लगातार पाँच खेल जितेको दुबै टिमको समान अंक भए पनि नेपाल नेट रन रेटमा अगाडि निकै अगाडि छ ।
नेपाल र सिंगापुरले यसअघि टी २० विश्वकप छनोटको एसिया फाइनलमा स्थान बनाइसकेका थिए । तर, अन्तिम टोली टुंगो लागेको थिएन । शुक्रबार चीनलाई १० विकेटले हराएसँगै मलेसिया अघिल्लो चरणमा पुग्न सफल भएको छ ।
थाइल्याण्डको समान ७ अंक भएपनि नेट रन रेटका आधारमा मलेसिया तेस्रो बन्न सफल भएको छ । अब एसिया छनोट ‘ए’बाट आएका यूएई, कतार र कुवेत तथा बीबाट आएका नेपालसहित सिंगापुर र मलेसियाले एसिया फाइनल खेल्नेछन् ।
