विराटनगर, कार्तिक १२
विराटनगरका होटलहरुमा शाकाहारी र मांशाहारी खानेकुरा सामाग्री एकै स्थानमा राख्ने गरिएको भेटिएको छ । वाणिज्य कार्यालय विराटनगरको आयोजनामा सोमबार विराटनगरका विभिन्न होटलहरुको अनुगमनका क्रममा यस्तो भेटिएको हो ।
वाणिज्य कार्यालय विराटनगरको नेतृत्वमा भएको अनुगमनमा पत्रकार महासंघ मोरङ नजिकै रहेको टिफिन होटलको अनुगमन गरिएको छ । अनुगमनका क्रममा शाकाहारी र मांशाहारी खानेकुरा एउटै फ्रिजमा राखिएको पाइएको छ भने सरसफाइमा ध्यान दिन टोलीले निर्देशन दिएको छ ।
यस्तै विराटनगरमा रहेको सिन्धी होटललाई भान्सा नजिकै रहेको शौचालय बन्द गर्न निर्देशन दिइएको छ । अनुगमनका क्रममा भान्सामा चिम्नी राखी सरसफाइमा ध्यान दिन निर्देशन दिइएको छ ।
यस्तै बसपार्क छेउका कार्की होटल र थापा होटलको अनुगमन गरिएको छ । दुवै होटलहरुले सरसफाइमा ध्यान दिएको पाइएको थियो भने ती होटलमा मूल्य सुची राख्न निर्देशन दिइएको छ । टोलीले अनुगमनलाई निरन्तरता दिने जनाएको छ ।
