स्याङजा, कात्तिक १५
नेपाल प्याराग्लाइडिङ तथा ह्याण्डग्लाइडिङ संघ, नेपाल हवाई खेलकुद संस्था र बाबु एड्भेन्चर क्लब स्याङ्जाको संयुक्त आयोजनामा नेपालमा पहिलो पटक प्याराग्लाइडिङ विश्वकप आजदेखि सुरू भएको छ ।
स्याङ्जाको स्वरेक महापुर मैदान र डौवाफाँटमा आजदेखि सुरु प्रतियोगिता कार्तिक १८ गतेसम्म चल्नेछ । स्याङजालाई प्याराग्लाइडिङको ट्रेनिङ सेन्टरको रुपमा समेत विकास गर्न नेपालमा पहिलो पटक यो प्रतियोगिताको आयोजना गरिएको हो ।
जसमा प्याराग्लाइडर्सहरुले समुद्र सतहदेखि १६०० मिटरको उचाइबाट जम्प गर्नेछन् भने ८ सय मिटरमा ल्याण्ड गर्नेछन् । पुरुष र महिलाको टिम तथा व्यक्तिगत एक्युरेसी गरी ४ स्वर्णकालागि हुने प्रतियोगितामा नेपालसहित क्यानडा, चीन, नेदरल्याण्ड, फ्रान्स, टर्की, कोरिया, जर्मनी, ईन्डोनेसिया, मलेसिया, मंगोलिया, भारत, पाकिस्तान, यूएई, अमेरिका, सिंगापुर, इरान, हंगेरी, स्लोभानिया, थाइल्याण्ड, सिङापुर र इजिप्ट गरी २२ देशका खेलाडीबीच प्रतिस्पर्धा हुनेछ । प्रतियोगितामा बिदेशी र स्वदेशी सहित १ सय जना भन्दा बढी खेलाडीको सहभागिता हुनेछ ।
