विराटनगर,मंसिर २४
नेपालकै सस्तो बजार नेपाल बजार भन्ने मुल नाराका साथ करिब ८ वर्ष अघि खुलेको विराटनगरको पहिलो डिपार्टमेन्ट स्टोर नेपाल बजार बन्द हुने अवस्थामा पुगेको छ ।
विराटनगरको प्रतिष्ठित तथा पहिलो सुपर मार्केट ‘नेपाल बजार’ नयाँ खुलेका सपिङ महलहरुसँग प्रतिस्पर्धा गर्न नसकेका कारण बन्द हुने अवस्थामा पुगेको हो । हाल विराटनगरमा एक पछि अर्को सपिङ महल खुल्दै जाँदा ग्राहकको मन अन्तै मोडिन थालेपछि विराटनगर महेन्द्र चौकमा विगत ८ वर्षदेखि सञ्चालनमा रहेको नेपाल बजार बन्द हुने अवस्थामा पुगेको हो ।
बन्द गर्ने अवस्थामा पुगेको सो नेपाल बजारले केही दिन यता एक्कासि भारी छुट दिएर बाँकी स्टकहरु बेच्न थालेपछी ग्राहकहरुको भिड लागेको छ । नेपाल बजारले अहिले खाद्यान्न सामाग्रीबाहेक अन्य समाग्रीमा ४० प्रतिशत सम्म छुट दिएपछि बिहिबार नेपाल बजारमा थामी नसक्नुको भिड लागेको थियो ।
नेपाल बजारमा सामाग्री किन्न आएका मोहम्मद जिब्रीलले नेपाल बजार बिक्री हुने हल्ला चलेको र स्टक सकाउन ५० प्रतिशत छुट दिएको सुनेर समान किन्न आएको बताए ।
२०६७ साल भदौ ७ गतेबाट सञ्चालनमा आएको नेपाल बजार एक समय निकै राम्रोसँग चलेको थियो तर अहिले आएर यसका अन्य ४ शाखाहरु समेत बन्द भईसकेको अवस्था छ । टंकीसिनवारी,कञ्चनबारी,पुष्पलाल चौक र तीनपैनीमा सञ्चालनमा आएका नेपाल बजारका शाखाहरु यसअघि नै बन्द भईसकेका छन् ।
बजारमा नयाँ सुपरमार्केट खुलेपछि घाटामा लागेकोले यहाँका कर्मचारी पनि कटौती गरिएको छ । बजारमा बिक्रीको हल्ला चलिरहेका बेला नेपाल बजारका म्यानेजिङ डायरेक्टर कविन श्रेष्ठले भारी छुट दिएर सम्पूर्ण सामानहरु सकभर बेच्ने आफुहरुको योजना रहेको र भबिष्यमा नचलेको खण्डमा बेच्न पनि सकिने बताए । उनले छुटको कुरा सुनाएपछि ग्राहकहरु बढ्ने अपेक्षाका साथ भारी छुट दिएको पनि प्रष्ट पारे ।
नेपाल बजारले र्गामेन्टस्, फुटवेयर, भाँडाकुँडा, ईलेक्ट्रोनिक्सलगायतका सामानमा एकाएक ४० प्रतिशत छुट दिएको छ । कुनैवेला राम्रो ब्यापार गरेको नेपाल बजार साँच्चै बन्द हुने अवस्थामा पुग्नु सुखद होइन ।यसले नयाँ खुल्ने क्रममा रहेका सपिङ मलहरुलाई समेत निरुत्साहित पार्ने कुरामा दुईमत छैन ।
