विराटनगर, फागुन २
नेपाल पत्रकार महासंघको केन्द्रीय मिशन टोलीले प्रदेश १ मा बन्दै गरेका प्रेससँग सम्बन्धित कानुनको विषयमा छलफल गरेको छ । मिशनले मोरङका पत्रकारहरुसँग पनि सञ्चार कानुन तथा पत्रकारका समस्याको विषयमा अन्तरक्रिया गरेको छ । नेपाल पत्रकार महासंघ मोरङले आयोजना गरेको अन्तरक्रियामा केन्द्रीय अध्यक्ष गोविन्द आचार्यले स्थानीय तहमा निर्माण भइरहेका कानुनको विषयमा समेत जानकारी लिएका थिए ।
कार्यक्रममा सहभागी पत्रकार सुभाष कार्कीले स्थानीय पत्रिकालाई समानुपातिक रुपमा दिइने विज्ञापनमा विभेद हुने गरेको बताए । यस्तै सक्रिय महिला पत्रकार ललिता भट्टराईले प्रेस काउन्सिलबाट स्थानीय अखबारलाई प्राप्त हुने सुविधामा रोक लगाइँदा समस्या भएको बताईन् ।
कार्यक्रममा महासंघको प्रदेश १ का महासचिव विवेक गौतमले प्रदेश र स्थानीय सरकारले निर्माण गरेको कानुनको विषयमा जानकारी गराएका थिए । यसैगरी प्रदेश नम्बर १ का मुख्यमन्त्री शेरधन राईसँग टोलीले भेटघाट गरेको कार्यक्रममा अध्यक्ष आचार्यले जानकारी दिए ।
सो क्रममा बनेका र अब बन्ने क्रममा रहेका कानुनहरुसमेत पूर्ण प्रेसमैत्री हुने मुख्यमन्त्री राईले आश्वासन दिएको अध्यक्ष आचार्यले बताए । अध्यक्ष आचार्यले प्रदेशले बनाएका कानुनलाई थप प्रेसमैत्री बनाउनेमा सबै एकजुट भएर लाग्नु पर्ने बताए । आचार्यले मिशन टोलीले सातै प्रदेशमा बन्दै गरेका कानुनको विषयमा छलफल गर्ने जानकारी दिए ।
