काठमाडौं, फागुन १२
नेपाल कम्युनिष्ट पार्टीको सचिवालयले कार्यदल भंग गरेपछि बहुमत सदस्यहरुले समानान्तर प्रतिवेदन तयार पारेका छन् । शनिबार नै बहुमत सदस्यले प्रधानमन्त्री तथा अध्यक्ष केपी ओलीलाई प्रतिवेदन बुझाउने तयारी गरेका थिए ।
तर, ओलीले कार्यव्यस्तताको कारण आइतबार प्रतिवेदन बुझाउने तयारी भएको सदस्य बेदुराम भुसालले जानकारी दिए । नेपाल अध्यक्ष एवं प्रधानमन्त्री ओली जन्मदिनको कार्यक्रममा व्यस्त भएपछि शनिबार पार्टी एकतासम्बन्धी कार्यदलले प्रतिवेदन बुझाउन नपाएका हुन् ।
पार्टी एकीकरणका लागि गठित ९ सदस्यीय कार्यदललाई शुक्रबार नेकपाको सचिवालयले विघटन गरेको थियो । संगठनात्मक एकीकरण कार्यदल भंग गरिएपछि ९ सदस्य कार्यदलका ५ सदस्यले छुट्टै प्रतिवेदन बनाएका हुन् ।
कार्यदलमा रहेका योगेश भट्टराई, सुरेन्द्र पाण्डे र भुसालसहित पाँचजनाले समानान्तर प्रतिवेदन बुझाउने तयारी गरेका हुन् । उनीहरुसँग वर्षमान पुन र लेखराज भट्टको पनि सहमति छ । केही नेताको असहमतिबीच बैठकले एकीकरण प्रक्रियाका बाँकी काम सचिवालयबाटै टुंग्याउने निर्णय गरेपछि उनीहरुको असहमति थियो ।
वरिष्ठ नेता माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठले स्थायी समितिले बनाएको कार्यदलले समय माग गर्दागर्दै भंग गर्न नहुने अडान राखेका थिए । कार्यदलका संयोजक रामबहादुर थापा बादल र महासचिव विष्णु पौडेलले भने काम गर्न नसक्ने बताएका थिए । त्यसपछि पुष्पकमल दाहाल ‘प्रचण्ड’ले अर्का अध्यक्ष ओलीको प्रस्तावमा समर्थन जनाउदै कार्यदल खारेज गर्न सहमति जनाएका थिए ।
पुसमा १३ गते सम्पन्न स्थायी समिति बैठकले संगठनात्मक एकीकरणको बाँकी काम, कार्य््िवभाजन, पोलिटब्युरो गठनलगायत कार्यादेशसहित ९ सदस्यीय कार्यदल बनाएको थियो । १५ दिनभित्र प्रतिवेदन बुझाउन अध्यक्ष ओली र प्रचण्डले निर्देशन दिए पनि सात पटकसम्म बसेको बैठकले विधान परिमार्जनबाहेकका विषयमा छलफलै गर्न सकेको थिएन । त्यसपछि अपूरो प्रतिवेदन सचिवालयलाई बुझाएको थियो ।
