भोजपुर, पुस २६
अख्तियार दुरुपयोग अनुसन्धान आयोगमा भोजपुर जिल्लाबाट अघिल्लो आर्थिक वर्ष २०७३/७४ मा २७ वटा मुद्दा दर्ता भएका थिए ।
मंगलबार जिल्लास्थित सरोकारवाला निकायसँग भ्रष्टाचार नियन्त्रणमा अख्तियार दुरुपयोग अनुसन्धान आयोगको भूमिका विषयमा अन्तरक्रिया गर्दै यस्तो जानकारी दिइएको हो ।
आयोगका अनुसार २७ वटा मुद्दा दर्ता भएकोमा २० वटा फछ्र्याेट भइसकेकोे र यस आवको मंसिर मसान्तसम्ममा १५ वटा नयाँ मुद्दा दर्ता भएकोमा छवटा फछ्र्याेट भइसकेका छन् ।
भोजपुरका सरकारी कार्यालय तथा संघ संस्थालाई पारदर्शी र सेवाग्राहीप्रति उत्तरदायी हुन अनुरोध गरिएको छ । अन्तरक्रियामा अख्तियार दुरुपयोग अनुसन्धान आयोगका आयुक्त डा. सावित्री थापा गुरुङले जिल्लास्थित कार्यालयको वातावरण सेवाग्राही उन्मुख बनाउनुपर्ने बताएका थिए ।
अख्तियार दुरुपयोग आयोग क्षेत्रीय कार्यालय धनकुटाका प्रमुख पुरुषोत्तम दाहाल र कर्मचारी प्रदीप कोइरालाले कार्यपत्र प्रस्तुत गरेका थिए ।
रासस
