विराटनगर, बैशाख ५
विद्युतीय कारोबार ऐन अन्तर्गतका विभिन्न दुइ दफा खारेजीको माग गर्दै मोरङका पत्रकारहरुले जिल्ला प्रशासन कार्यालय अगाडी धर्ना दिएका छन् । सो ऐनका दफा ४७ र ४८ लाई पूर्ण खारेजीको माग गर्दै नेपाल पत्रकार महासंघ मोरङको अगुवाइमा जिल्लाका पत्रकारहरुले बिहिबार विहान १ घण्टा धर्ना दिएका हुन् ।
विद्युतीय कारोबार ऐनको दफा ४७ र ४८ को आधार बनाए पत्रकारलाई पटकपटक पक्राउ तथा धरपकड गर्ने क्रम बढेको भन्दै पत्रकारहरु आन्दोलित भएका हुन् । पत्रकारहरुले जिल्ला प्रशासन कार्यालय मोरङको मुल गेटमा विहान ९ः३० बजेदेखि १ घण्टासम्म धर्ना दिएका हुन् ।
विद्युतीय कारोवार ऐनको आधारमा समाचार लेखेकै बिषयलाई लिएर पत्रकारलाई पक्राउ गर्ने तथा धडपकड गर्ने काम भएको नपाल पत्रकार महासंघ प्रदेश १ का अध्यक्ष बिक्रम लुईटेलले बताए ।
धर्ना समापन गर्दै महासंघ मोरङका अध्यक्ष बन्धु पोखरेलले विद्युतीय कारोबार ऐनको दफा ४७ र ४८ को खारेजी एवं पत्रकार अर्जुन गिरीसहित पक्राउ गरिएका पत्रकारको बिनासर्त रिहाइको मागलाई लिएर आन्दोलित हुनु परेको बताए ।
उनले सो ऐनका उक्त दफा खारेजीको माग गर्दै केन्द्रको पहिलो चरणको कार्यक्रम अनुसार धर्ना बसिएको र दफा खारेज नहुँदासम्म केन्द्रको निर्णय अनुसार आन्दोलनका कार्यक्रम अघि बढाइने बताए ।
धर्नामा महासंघ प्रदेश नं. १ का अध्यक्ष विक्रम लुइटेल, महासचिव विवेक गौतम लगायत विभिन्न सञ्चार माध्यममा क्रियाशिल पत्रकारहरुको सहभागीता रहेको थियो । महासंघ केन्द्रको आब्हानमा बिहीबार प्रदेश १ का सबै जिल्लाहरुमा पत्रकारहरु प्रशासन कार्यालयको गेटमा धर्नामा बसेका छन् ।
