विराटनगर, चैत ६
प्रदेश नं. १ का दुइ छुट्टाछुट्टै सवारी दुर्घटनामा बिहिबार दुई जनाको मृत्यू भएको छ । सो प्रदेश स्थित मोरङको बुढीगंगा गाउँपालिका–३ मा ट्रकले मोटरसाईकललाई ठक्कर दिँदा एक जनाको मृत्यू भएको छ ।
बुढीगंगा–३ स्थित कोशी राजमार्गमा विराटनगरबाट इटहरी तर्फ जाँदै गरेको ना २ ख ५३५२ नम्बरको ट्रकले विपरीत दिशाबाट आउँदै गरेको ना ४६ प २५८५ नम्बरको मोटरसाईकललाई ठक्कर दिँदा गम्भिर घाईते बनेका मोटरसाईकल चालक सुनसरीको गढी गाउँपालिका–२ का २५ वर्षिय सन्तोष साहको टंकिसिनुवारी स्थित शिक्षण अस्पतालमा उपचारका क्रममा मृत्यू भएको प्रहरीले जनाएको छ ।
घटनामा संलग्न ट्रक र चालक सुनसरी रामधुनी नगरपालिका–१ का ३० वर्षिय दिपेन बि.क. लाई प्रहरीले नियन्त्रणमा लिएको छ । त्यस्तै भोजपुरको हतुवागढी गाँउपालिका–९ मा ट्याक्टर दुर्घटना हुँदा एक जनाको मृत्यू भएको छ ।
सापिङटारबाट ज्यामिरे तर्फ दाउरा लोड गरेर जाँदै गरेको को २ त ८७१४ नम्बरको ट्याक्टर आँफै अनियन्त्रित भई सडकबाट ३५ मिटर तल खसेर दुर्घटना हुँदा ट्याक्टरमा सवार स्थानीय ३५ वर्षिया शान्ति मगरको घटनास्थलमै मृत्यू भएको इलाका प्रहरी कार्यालय घोरेटारले जनाएको छ ।
घटनामा संलग्न ट्याक्टर र चालक सथानीय ३६ वर्षिय मेघराज राईलाई प्रहरीको नियन्त्रणमा राखिएको प्रदेश प्रहरी कार्यालय विराटनगरले जनाएको छ ।
