विराटनगर, बैशाख १०
त्रिभुवन विश्वविद्यालय अन्तर्गतका आंगिक क्याम्पस र कार्यालयहरुमा बेरुजु रकम २१ अर्ब रुपैया पुगेको छ । त्रिभुवन विश्वविद्यालयले विराटनगरमा मंगलबार आयोजना गरेको आर्थिक तथा बेरुजु व्यवस्थापन कार्यक्रममा विश्वविद्यालयमा बेरुजु रकम १९ अर्ब रुपैयाबाट बढेर २१ अर्ब रुपैया पुगेको त्रिभुवन विश्वविद्यालयका रजिष्ट्रार डिल्लीराम उप्रेतीले बताएका हुन् ।
उनले बेरुजु व्यवस्थापनमा कडाई गर्न निर्देशन पनि दिएका छन् । यसमा करिब ८५ प्रतिशत सैद्धान्तिक बेरुजु रहेकाले तत्काल फछ्र्यौट गर्न विश्वविद्यालयका रजिष्ट्रार उप्रेतीले कर्मचारीहरुलाई निर्देशन दिएका हुन् ।
अस्वभाविक रुपमा बढ्दै गएको बेरुजु न्यून गर्न लेखा तथा प्रशासन प्रमुखहरुलाई उहाँले निर्देशन दिनुभएको छ । कार्यक्रममा रजिष्ट्रार उपे्रतीले त्रिभुवन विश्वविद्यालयको शैक्षिक, प्रशासनिक र आर्थिक क्षेत्र सबै तिर बेथिति रहेका कारण सुशासन आवश्यक भएको बताए ।
सरकारी अनुदानमा संचालन भईरहेको त्रिभुवन विश्वविद्यालयको बेरुजु बढ्दै गएपछि आम्दानी, खर्च र धरौटी गरी तीन वटा मात्र खाता संचालन गर्न सम्बन्धित कार्यालयहरुलाई निर्देशन दिएकोमा त्यो अझै कार्यान्वयनमा आउन सकेको छैन ।
दुई दिने सो कार्यक्रममा एक नम्बर प्रदेशका १४ जिल्लाका त्रिभुवन विश्वविद्यालयका १३ वटा आंगिक क्याम्पस र एउटा क्षेत्रीय परिक्षा नियन्त्रण कार्यालयका प्रशासन र लेखा प्रमुखहरुको सहभागिता रहेको छ । बेरुजु घटाउने कार्यालयलाई पुरस्कारको समेत व्यवस्था गरिएको जनाइएको छ ।
