गोरखा, वैशाख १४
गोरखाको लाप्राकमा निर्माणधिन नमुना बस्ती अन्तिम चरणमा पुगेको छ । गैरआवासीय नेपाली संघले नेपालको सहयोगमा नेपाली सेनाले सो बस्ती बनाइ रहेको छ । निर्माणको काम अन्तिम चरणमा पुगेकाले छिट्टै बस्ती हस्तान्तरण गर्ने तयारी गरिएको छ ।
गोरखाको धार्चे गाउँपालिकाको गुप्सीपाखामा निर्माणाधिन लाप्राक नमुना बस्तीको गैरआवासीय नेपाली संघको टोलीले अवलोकन गरेको छ । अवलोकनपछि संघका अध्यक्ष भवन भट्टले भूकम्प पीडितको लागि निर्माण भएको नमुना बस्ती छिट्टै विशेष कार्यक्रमको आयोजना गरेर हस्तान्तरण गरिने बताए । अध्यक्ष भट्टले बस्तीको रंगरोगनसहित बाह्य संरचनाको सम्पूर्ण काम सकिएको बताउँदै छिट्टै हस्तान्तरण गर्ने बताए ।
२०७२ सालको गोरखा भूकम्पपछि लाप्राकमा ५ सय ७३ घरको निर्माण सुरु गरिको थियो । प्रतिकुल मौसम र भौगोलिक विकटताको कारणले सो परियोजना निर्माणमा ढिलाई भए पनि अब सम्पन्न हुने क्रममा रहेको छ ।नमुना बस्ती निर्माण समितिको संयोजक तथा गैरआवासीय नेपाली संघकी उपाध्यक्ष सपीला राजभण्डारीले अन्तरक्रिया कार्यक्रममा परियोजनाको प्रगतिका बारेमा जानकारी गराउनुका साथै वस्ति निर्माण कार्यमा सहयोग गर्ने सबैलाई धन्यवाद गरिन् ।
समारोहमा धार्चे गाउँपालिकाकी उपप्रमुख फूलमायाँ गुरुङ्गले गैरआवासीय नेपाली संघले गरेको सहयोगप्रति लाभग्राहीको तर्फबाट धन्यवाद दिँदै गाउँपालिकाले बस्तीलाई नमुना बस्तीको रुपमा रुपान्तरण गर्न सक्दो सहयोग गर्ने बताए । कार्यक्रममा गाउँपालिकाका पदाधिकारी र सदस्यहरु, स्थानीय समुदाय तथा बस्ती निमार्णमा खटिएका नेपाली सेनाको प्रतिनिधिहरुको सहभागिता थियो ।
