१५ जेष्ठ,२०७६
सरकारले उर्जा क्षेत्रका लागि ८३ अरव ४९ करोड बजेट विनियोजन गरेको छ ।
संघीय संसदमा बुधबार सार्वजनिक गरिएको बजेटमा उर्जा क्षेत्रका लागि ८३ अरव ४९ करोड बजेट विनियोजन गरिएको उल्लेख गरिएको हो । मुलुकको समृद्धिको संवाहकको रुपमा जलविद्युत क्षेत्रको विकास हुने गरी सो बजेट विनियोजन गरिएको अर्थमन्त्री डा. युवराज खतिवडाले जानकारी दिए। बजेटमा उर्जाको कम पहुँच भएको प्रदेश २, कर्णाली प्रदेश र सुदूरपश्चिम प्रदेशलाई अन्धकारमुक्त प्रदेश घोषणा गर्ने प्रतिवद्धता पनि व्यक्त गरिएको छ ।
बजेटमा आगामी आर्थिक वर्ष भित्र ४ सय ५६ मेघावाटको माथिल्लो तामाकोसी जलविद्युत आयोजनाको निर्माण कार्य सम्पन्न गर्ने योजना पनि समावेश गरिएको छ । अर्थमन्त्री खतिवडाले बुढीगण्डकी जलविद्युत आयोजनाका लागि १३ अरव ५७ करोड, तनहु जलविद्युत आयोजनाका लागि ८ अरव ९० करोड तथा तामाकोसी ५ जलविद्युत आयोजनाका लागि १ अरव ८५ करोड बजेटको व्यवस्था गरिएको पनि बताउनु भयो । बजेटमा सबै प्रदेशमा दुई वटा जलविद्युत तथा सौर्य उर्जा परियोजना संचालनमा ल्याउने कार्यक्रम पनि समावेश गरिएको छ ।
