१७ असार, विराटनगर ।
नेपालमा विकास निर्माणका काममा सम्बन्धित सरोकारवाला निकायहरुबीच समन्वय नहुने घटना पूरानो भने होइन । तर निमार्णाधीन रानी, विराटनगर हुदै धरानसम्मको ६ लेन सडक योजनाको टंकी सिनुवारी खण्डमा सरोकारवाला निकायबीच देखिएको समन्वयको अभावले सार्वजनिक महत्वका दीर्घकालीन योजनामा पनि उनीहरु कति लापरवाही गर्छन भन्ने कुरालाई उदाँगो पारिदिएको छ ।
विराटनगर महानगरपालिकाको उत्तरी सिमानामा रहेको विराटनगर गेटबाट मोरङको बुढिगंगा गाउँपालिकाको टंकीसिनुवारी सडक खण्डतिर हेर्दा सडकबीचमा एउटा अनौठो दृश्य देख्न सकिन्छ । पिच भईसकेको ६ लेन सडकको बिच भागमै एउटा बिजुलीको पोल ठडिएको छ । त्यसभन्दा केही पर पनि सडक बिचमा दायाँ–बायाँ दुवैतर्फ पोल ठडिएका छन् । सडक पिच अघि नै हटाउनु पर्ने ती पोलहरु विद्युत प्राधिकरण र परियोजनाबीच समन्वय नहुँदा पिच भएको लामो समय भईसक्दा पनि हटइएका छैनन् । पहिले त्यस ठाउँमा झण्डै एक दर्जन पोलहरु नै नसारी पिच गरिएको थियो । तर पछि केही पोलहरु हटाईएपनि केही पोलहरु अझै हट्न सकेका छैनन् । खुला सडकको बीच भागमा रहेका बिजुलीका पोल हट्न नसक्दा त्यस ठाउँमा धेरै दुर्घटना भईसकेका छन् । जसका कारण सवारी चलाउन कठिन हुने गरेको र ती पोलहरु तत्काल नहटाए कुनैपनि बेला अझ ठूलो दुर्घटना निम्तिन सक्ने सवारी चालकहरु बताउँछन् ।
सडकबीचमा रहेका बिजुलीका पोल दुर्घटनाको हिसाबले अत्यन्तै संवेदनशील भएपनि पोल सार्नका लागि नत ठेकेदार कम्पनी नै तातेको छ नत विद्युत प्राधिकरण नै । बिजुली सडक क्रसिङ गराउनका लागि ओभरहेडबाट क्रसिङ गर्नु पर्ने सम्झौता भएपनि त्यसो नगर्न विद्युत प्राधिकरणले परिपत्र गरेको थियो । तर, बजेट अभाव लगायतका कारण देखाउदै प्रोजेक्टमा ठूलो असर पुग्ने देखिएपछि प्राधिकरणले पुनः ओभरहेडबाटै क्रसिङ गर्न परिपत्र गरेको विराटनगर– धरान सडक योजनाका इन्जिनियर अमरेन्द्र यादवको भनाई छ । क्रसिङका लागि १३ मिटर उचाइको टेलिस्कोपीक पोल चाहिएको र बजारमा पोल नपाइएको बताउँदै उनले पोल आएपछि चाँडै नै सारिने दावी गरे ।
सवारी चलाउन जोखिम बढ्दै जादा नेपाल विद्युत प्राधिकरण विराटनगर वितरण केन्द्रका प्रमुख राजिवकुमार सिंहले भने त्यो सबैको समस्या भएकोले त्यसबारेमा छलफल भइरहेको र पोल सार्ने तथा तारहरु फेर्ने काम चाँडै सुरु हुने बताए । २०७० सालदेखि निर्माण सुरु भएको सो ६ लेन सडक परियोजनाको काममा ढिलाइ हुनुका साथै कतिपय स्थानमा निर्माणमा पनि लापरबाही भएको पाइएको छ ।
