७ भदौ, विराटनगर ।
विराटनगरमा आज शनिबार ऐतिहासिक श्रीराधाकृष्ण रथयात्रा निकालिंदै छ । विक्रम सम्बत २०२५ सालबाट सुरु भएको रथयात्राको यो ५२ औं संस्करण हो ।
दिउँसो साढे ३ बजे निकालिने रथको साजसज्जा र ब्यवस्थापन लगायतको काम सम्पन्न भएको रथयात्रा आयोजक समितिका अध्यक्ष बाबुराजा ओझाले जानकारी दिए ।
प्रदेश प्रमुख प्राध्यापक डाक्टर गोबिन्दबहादुर तुम्बाहाङ र मुख्यमन्त्री शेरधन राईले रथयात्राको उद्घाटन गर्ने कार्यक्रम छ । ५ लाख बढी श्रद्धालुको सहभागिता रहने अपेक्षा गरिएको रथयात्रालाई ब्यवस्थित गर्न जिल्ला प्रहरी कार्यालय मोरङले १५ सय बढी प्रहरी परिचालन गरेको छ ।
यसैगरी भीडभाडका कारण हुनसक्ने अवांछित गतिविधि नियन्त्रण गर्न ड्रोन क्यामराबाट सुरक्षा निगरानी गर्ने ब्यवस्था मिलाइएको छ । विराटनगरको वडा नम्बर १,२ र ३ को संगमस्थलमा रहेको राधाकृष्ण मन्दिरबाट निकालिने रथयात्राले मेनरोड सहित कोशी राजमार्गको ७ किलोमिटर सडक खण्डको परिक्रमा गर्नेछ ।
धार्मिक सहिष्णुताको पर्वकोरुपमा स्थापित भएको रथयात्रामा विभिन्न जातिय समुदाय र भजनमण्डली समेतका गरेर ५ दर्जन बढी झांकीको सहभागिता रहने रथयात्रा आयोजक समितिले जनाएको छ । विक्रम सम्बत १९८८ सालमा खट्यात्राकोरुपमा सुरु गरिएको यात्राले २०२५ सालबाट रथयात्राको रुप लिएको हो ।
रथयात्रामा नेपालका विभिन्न जिल्लाका साथै भारतबाट आउने श्रद्धालुहरुको सहभागिता रहने गरेको छ ।
