२० भदौ, काठमाडौं ।
प्रधानमन्त्री केपी शर्मा ओली दुई साता लामो स्वास्थ्य परीक्षणपछि आज स्वेदश फर्किएका छन् ।
मिर्गौलामा समस्या देखिएर उपचारका लागि सिंगापुर पुगेका उनको सिंगापुरको नेसनल युनिभर्सिटी अस्पतालमा सात चरणमा प्लाज्मा फेरेसिस विधिबाट मिर्गौलाको उपचार गरिएको हो ।
प्रधानमन्त्रीको शरिरमा एण्टिबडी बढेपछि स्वास्थ्यमा नकारात्मक असर देखिँदा त्यसको निराकरणका लागि प्रधानमन्त्री दोस्रो पटक सिंगापुर गएका हुन् ।
शुक्रबार फर्किएका प्रधानमन्त्रीको शरीरमा बढी मात्रामा रहेको एण्टिबडी वैज्ञानिक प्रविधिबाट हटाउने उपचार प्रक्रिया एनयूएचमा पूरा भएको र उनको स्वास्थ्य अवस्था अहिले राम्रो रहेको प्रधानमन्त्रीको निजी चिकित्सक डा.दिव्या सिंह शाहले बताइन् ।
अब प्रधानमन्त्रीले आफ्नो नियमित कामलाई निरन्तरता दिन सक्ने पनि उनले बताइन्। १२ वर्षअघि प्रत्यारोपण गरिएको मिर्गौलामा समस्या देखिएपछि उनको नियमित उपचार हुँदै आएको छ ।
प्रधानमन्त्री ओली पहिलो पटक उपचारका लागि सिंगापुरबाट फर्केको एक सातामै फेरि उपचारका लागि गएकाले धेरैले प्रधानमन्त्रीको स्वास्थ्यका बारे चासो राखेका छन् । संसद बैठकमै पनि प्रधानमन्त्रीको स्वास्थ्य अवस्थाका बारेमा सांसदहरुले चासो राखेका थिए ।
