१४ मंसिर, काठमाडौँ ।
शनिबार भएको उपनिर्वाचन शान्तिपूर्ण रूपमा सम्पन्न भएको निर्वाचन आयोगले निष्कर्ष निकालेको छ । निर्वाचन आयोगले शनिवार साँझ पत्रकार सम्मेलन गर्दै निर्वाचन शान्तिपूर्ण रुपमा सम्पन्न भएको बताएको हो ।
पत्रकार सम्मेलनमा प्रमुख निर्वाचन आयुक्त दिनेश थपलियाले केहि स्थानमा भएको छिटपुट घटना बाहेक उपनिर्वाचन भएका सम्पुर्ण क्षेत्रमा निर्वाचन शान्तिपूर्ण रुपमा सम्पन्न भएको बताए । निर्वाचन सम्पन्न भएका प्रतिनिधि सभा र प्रदेश सभा बाहेक स्थानीय तहको मतगणना र परिणाम राती १२ बजे पछि आउन थाल्ने पनि बताए । प्रमुख आयुक्त थपलियाले निर्वाचन पर्यवेक्षणमा खटिएका पर्यवेक्षकहरुले पनि निर्वाचन शान्तिपूर्ण ढंगले सम्पन्न भएको प्रारम्भिक प्रतिवेदन दिएको बताए ।
सबै स्थानको मतपरिणाम भने सोमबारसम्ममा सार्वजनिक हुने निर्वाचन आयोगले बताएको छ । शनिबार उपनिर्वाचनका क्रममा जम्मा ३७ जिल्लाका ५२ निर्वाचन क्षेत्रमा मतदान भएको छ । तर रोल्पाको थवाङ गाउँपालिका–१ मा वडाध्यक्षका लागि भएको उपनिर्वाचनमा भने १६.४ प्रतिशत मात्रै मतदान भएको छ । कूल १ हजार २ सय ७४ मतदाता रहेको थवाङ्गमा २ सय ९ मत मात्रै खसेको छ ।
