२९ मंसिर, रौतहट ।
रौतहटको मध्यभाग गरुडास्थित श्रीराम सुगर मिल्स यस वर्ष सञ्चालनमा नआउने भएपछि उखु किसान मर्कामा परेका छन् ।
२५ वर्षदेखि सञ्चालनमा आएको यो मिल किसानको साढे ३७ करोड रुपैयाँ भुक्तानी तिर्न बाँकी रहेकै अवस्थामा बन्द गर्न लागिएको भन्दै कृषकहरु चिन्तित बनेका हुन् ।
मिल बन्द हुनासाथ पुरानो बाँकी भुक्तानी नपाइने र खेतमा लगाइएको उखु बिक्रीमा समस्या हुने भन्दै कृषकहरु चिन्तित बनेका हुन् । यो वर्ष यस क्षेत्रका ८ हजार किसानहरुले करिब ८ हजार विगाहा क्षेत्रफलमा खुट्टी, कार्तिका, माघे प्रजातीको उखु लगाएका छन् ।
उक्त क्षेत्रफलमा लगाइएको उखुको अनुमानित उत्पादन १४ लाख क्वीन्टल हुने र सो बापत ६५ करोड ९६ लाख ८० हजार रुपैयाँ हुने अनुमान गरिएको छ । मिलले किसानलाई तिर्न बाँकी रहेको साढे ३७ करोड रुपैयाँ भुक्तानीसहित झण्डै ६३ करोड रुपैयाँ ऋण रहेको छ ।
पछिल्लो समय मिल्सको क्रसिङसमेत कम हुँदै आएको थियो । १५ देखि २० हजारसम्म क्रसिङ हुन थालेको मिल्समा ११ हजार क्वीन्टल चिनी स्टकमा रहेपनि सो चिनी बिक्री गर्न किसानले रोक लगाएका छन् ।
मिल्सलाई प्रदेश या संघीय सरकारको मातहतमा ल्याएर भए पनि सञ्चालन गर्नुपर्ने कृषकहरुको माग छ । अर्कोतिर यहाँ कार्यरत ३ सय ९५ जना कर्मचारी पनि बेरोजगार बन्ने स्थिति बनेको छ ।
