२९ मंसिर, काठमाडौँ ।
सरकारले शैक्षिक कर्जा कार्यान्वयनमा ल्याएसँगै शैक्षिक योग्यताको प्रमाणपत्र धितो राखेर ३८ जना युवाले २ करोड १५ लाख ५० हजार ऋण लिएका छन् । सहुलियतपूर्ण कर्जाका लागि ब्याज अनुदान सम्बन्धी एकिकृत कार्यविधि लागू भएपछि प्रमाणपत्र धितोमा राखेर त्यस्तो कर्जा प्रवाह भएको हो ।
कर्जा प्रवाह गर्नेमा निजी भन्दा सरकारी बैंक बढी रहेका छन् । राष्ट्रिय बाणिज्य बैंकले सबै भन्दा धेरै कर्जा प्रवाह गरेको छ । नेपाल राष्ट्र बैंकका अनुसार कात्तिक मसान्त अवधीमा बिभिन्न ७ प्रकारका सहुलियतपूर्ण कर्जामा ४७ अर्ब ३१ करोड ४१ लाख ८६ हजार रुपैयाँ प्रवाह भएको छ । २० हजार ८ सय ६९ जनाले सहुलियत कर्जा लिएका छन् । ४५ अर्ब ९३ करोड ५१ लख २९ हजार रुपैयाँ भने कृषि कर्जामा प्रवाह भएको छ ।
बैंक तथा वित्तिय संस्थाहरुले कृषि बाहेकका अन्य क्षेत्रमा ऋण प्रवाह गर्न आनाकानी गरेपछि सरकारले बाध्यकारी नयाँ व्यवस्था अघि सारेको छ । कार्यविधि संसोधन गरेर कृषि बाहेकको कर्जा बाणिज्य बैंकहरुले ५ सय, विकास बैंकले २ सय र फाइनान्स कम्पनीले एक सय वटा प्रवाह गर्नै पर्ने व्यवस्था अघि सारेको छ । जस अनुसार आगामी असार मसान्त अवधीभित्र त्यस्तो कर्जा प्रवाह गरिक्सनुपर्नेछ ।
स्नातक तह उतीर्ण गरेका ४० वर्ष भन्दा कम उमेरका युवाहरुले बिजनेश प्रपोजल तयार पारी आफ्नो प्रमाणपत्र धितो राखेर ७ लाखसम्म ऋण पाइने व्यवस्था छ । त्यस्तो ऋणमा ५ प्रतिशत ब्याज अनुदान सरकारले उपलब्ध गराउँदछ।
