२१ माघ, काठमाडौं । चीनबाट आयात रोकिएसँगै लसुनको भाउ झण्डै तीन गुणाले महँगीएको छ ।
एक महिनाअघि दुई सय ४५ रुपैयाँ प्रतिकेजी खुद्रा मूल्य रहेको लसुनको भाउ बढेर ६ सय पाँच रुपैयाँ प्रतिकेजी पुगेको कालिमाटी फलफूल तथा तरकारी बजार विकास समितिले जनाएको छ ।
आयात बन्द भएसँगै व्यापारीले यसअघि नै ल्याएको लसुनको भाउ बढाएका हुन् । कोरोना भाइरसको सङ्क्रमण बढेपछि चीनबाट आयात रोकिँदा लसुनको भाउ बढेको कालिमाटी थोक व्यवसायी संघका अध्यक्ष भरत खतिवडाले बताए ।
अहिले आयात ठप्प रहेको र गोदाममा भण्डारण गरिएको लसुन पनि सकिन लागेकोले अब केही दिनमा बजारमा सुकेको लसुन नपाइने उनको भनाइ छ । नेपालमा बर्षेनी करोडौँ रुपैयाँको सुकेको लसुन चीनबाट आयात हुने गरेको छ ।
